Prishtinë, 2 qershor 2022 – Ambasadori amerikan në Prishtinë, Jeffrey Hovenier, tha se ka biseduar me anëtarët e Komisionit Parlamentar për Punë të Jashtme dhe Diasporës për tema të sigurisë kombëtare dhe ato të politikës së jashtme.
Pas takimit, që ishte i mbyllur për publikun, Hovenier, tha po ashtu se e vlerëson punën e Kuvendit, si institucion shumë i rëndësishëm në sistemet demokratike.
“Patëm një bisedë të frytshme për një sërë temash të sigurisë kombëtare dhe politikës së jashtme. Kam respektin më të lartë për rolin e Kuvendit, si element i sistemit demokratik dhe bazuar në këtë bisedë – kam pasur edhe më herët – kam më shumë respekt për anëtarët e këtij Komisioni dhe për punën që bëjnë në mbështetje të politikës së jashtme të Kosovës dhe prioriteteve të sigurisë kombëtare”, tha Hovenier.
Takimi u zhvillua më 2 qershor, me ftesë të dërguar nga Komisioni për Punë të Jashtme dhe Diasporë.
Kreu i këtij komisioni, Haki Abazi, deputet i Lëvizjes Vetëvendosje në pushtet, tha se komisioni është i hapur për këshilla dhe të mësojë nga përvoja e SHBA-së sa i përket shtetndërtimit.
“Rikonfirmuam lidhjen, marrëdhënien speciale dhe strategjike me Shtetet e Bashkuara, rrugëtimin tonë të përbashkët drejt integrimeve euro-atlantike. Natyrisht që rikujtuam disa prej aspekteve të ecjes së Kosovës drejt shtetndërtimit të plotë dhe natyrisht kjo do të vazhdojë, paçka që në rrugëtimin tone, në kontekstin tonë gjeopolitik, mund të ketë edhe çështje të cilat diskutohen, por ato janë mes miqsh, mes partnerësh, dhe kjo frymë e bashkëpunimit do të vazhdojë edhe më tutje”, tha Abazi.
SHBA-ja ishte ndër mbështetëset më të mëdha të shpalljes së pavarësisë së Kosovës dhe po vazhdon të mbështesë shtetin në përpjekjet për t’u anëtarësuar në organizata dhe institucione ndërkombëtare dhe për të konsoliduar shtetësinë.
(REL)