Prishtinë, 15 nëntor 2022 – Përfaqësuesit e subjekteve politike nga radhët e komunitetit serb që morën pjesë në zgjedhjet e fundit parlamentare në Kosovë shprehen të gatshëm për të marrë mandatet parlamentare të rezervuara për komunitetin serb në Kuvendin e Kosovës.
Në prononcime për redaksinë serbe të Radio Kosovës ata shprehen se është e nevojshme që serbët të kenë përfaqësuesit e tyre në parlament.
Politikanët serbë shprehen të gatshëm që t’i pranojnë mandatet në Kuvendin e Kosovës, pas dorëheqjes së deputetëve të Listës Serbe.
Rada Trajkoviq, kandidate e Iniciativës Qytetare “Liri, Drejtësi dhe Mbijetesë”, në një prononcim për redaksinë serbe të Radio Kosovës, thotë se serbët duhet të jenë pjesë e Kuvendit të Kosovës dhe për këtë arsye shpreh gatishmërinë ta pranojë mandatin e deputetes, nëse kjo i besohet.
“Do të ishte mirë që ata të zënë vendet e tyre në Kuvendin e Kosovës, duke më përfshirë edhe mua në mesin e tyre, që kuvendi të mos jetë pa serbë, gjë, që për mua është një problem i madh. Është në të njëjtën kohë një mbështetje për ata për të cilët askush nuk flet, që janë serbët e harruar në komunat e tjera të Kosovës”, tha ajo.
Edhe kryetari i Partisë Demokratike Progresive, Nenad Rashiq, mendon se është e nevojshme që serbët të jenë pjesë e Kuvendit të Kosovës, sepse është një nga mekanizmat për zgjidhjen e sfidave me të cilat ballafaqohen pjesëtarët e komunitetit serb.
“Ne besojmë se e vetmja mënyrë se si mund të përpiqemi t’i mbrojmë serbët dhe veçanërisht serbët e jugut, për të cilët nuk është folur fare në muajt e fundit është të luftojmë me mjetet që kemi në dispozicion. Këto janë mjete që mund të sigurohen përmes institucioneve të Kosovës në mënyrë të rregulluar me ligj”, tha ai.
I pyetur nëse do të marrë pjesë në zgjedhjet lokale në komunat në veri të Kosovës, Rashiq tha se nuk ka përgjigje për këtë pyetje.
Dhjetë deputetë të Listës Serbe në Kuvendin e Kosovës, një ministër në Qeverinë e Kosovës dhe kryetarët e katër komunave në veri të Kosovës, i dorëzuan dorëheqjet në fillim të javës së kaluar, në shenjë proteste ndaj vendimit të Qeverisë së Kosovës në lidhje me regjistrimin e automjeteve nga targat ilegale në RKS.
Komisioni Qendror i Zgjedhjeve nisi procedurat për zëvendësimin e deputetëve, ndërsa presidentja e Kosovës,Vjosa Osmani, shpalli datën e zgjedhjeve të jashtëzaknshme në katër komunat në veri të Kosovës.
(r.m.)