Prishtinë / Beograd, 30 maj 2023 – Kryeministri i Kosovës, Albin Kurti, dhe presidenti i Serbisë, Aleksandar Vuçiq, kanë anuluar vizitën në Bratisllavë të Sllovakisë, ku ishte paraparë të merrnin pjesë në një konferencë për sigurinë globale, Globsec.
Më herët gjatë të martës, nga Qeveria e Kosovës i tha Radios Evropa e Lirë se vizita e Kurtit në Sllovaki është shtyrë.
“Ka qenë e planifikuar [që Kurti] të shkojë. Por, për shkak të zhvillimeve në vend është shtyrë pjesëmarrja. Nuk është definitive ende nëse do të marrë pjesë ose jo”, thanë nga Qeveria e Kosovës.
Ndërkaq, Vuçiq ka njoftuar përmes Instagramit se nuk do të shkojë në Bratisllavë, për shkak se “është më e rëndësishme të jem me popullin tim”.
Burimet diplomatike i thanë më herët Radios Evropa e Lirë se i dërguari i posaçëm i BE-së për dialogun Kosovë-Serbi, Mirosllav Lajçak, ishte duke bërë përpjekje që të organizojë një takim ad hoc mes liderëve të Kosovës dhe Serbisë.
Sipas burimeve diplomatike, “kjo është një ide dhe një përpjekje” dhe se “ende nuk ka konfirmime nga palët se a janë të gatshme për një takim të tillë”.
REL po ashtu mëson se shefi i diplomacisë së BE-së, Josep Borrell, po ashtu planifikon të shkojë në Bratisllavë.
Të martën, ai deklaroi se “po punoj që të organizoj një takim urgjent të nivelit të lartë”, mes bartësve të dialogut mes Kosovës dhe Serbisë.
Kryeqyteti sllovak është përmendur si vend i mundshëm ku do të mund të takoheshin të dy bartësit e dialogut, për shkak se që të dy ishin ftuar të marrnin pjesë në konferencën për siguri globale, Globsec, që po zhvillohet në Sllovaki.
Kryeministri Kurti kishte paralajmëruar paraprakisht se do të merrte pjesë në një panel të martën pasdite me me temën: “E shkrirë – Ballkani Perëndimor dhe rruga drejt BE”-së.
Ndërkaq, presidenti i Serbisë, Aleksandar Vuçiq, ishte paraparë të marrë pjesë në një panel të mërkurën, me temën: “Rruga e hapur – Ballkani Perëndimor kthehet në punë”. Në këtë panel do të jetë i pranishëm edhe kryeministri i Shqipërisë, Edi Rama, dhe ai i Maqedonisë së Veriut, Dimitar Kovaçevski.
Prania e Kurtit dhe Vuçiqit, si dhe e Lajçakut në këtë konferencë, ishte parë si mundësi që të organizohet një takim i përbashkët i tyre.
Për një takim të tillë, sipas burimeve diplomatike, Lajçak e ka pasur edhe mbështetjen e disa prej shteteve më të rëndësishme perëndimore.
Një takim i tillë mes Kurtit dhe Vuçiqit u pa si përpjekje për të ulur tensionet në veriun e Kosovës, zonë ku serbët lokalë po protestojnë kundër kryetarëve të rinj shqiptarë dhe po kërkojnë tërheqjen e njësive speciale të Policisë së Kosovës nga veriu.
Më 29 maj, protestuesit serbë në Zveçan u përleshën me trupat e misionit të KFOR-it. Ky mision tha se tre ushtarë janë plagosur nga armët e zjarrit, ndërkaq edhe 27 të tjerë kanë pësuar lëndime të ndryshme.
Pas përleshjeve të së hënës, Bashkimi Evropian dhe NATO kanë kërkuar nga Kosova dhe Serbia që të angazhohen për “uljen e menjëhershme” të tensioneve.
(REL)