Kosova i kundërpërgjigjet Serbisë, ia refuzon kërkesën për vizitë një ministri serb

Prishtinë, 25 dhjetor 2024 – Kosova ia ka refuzuar kërkesën për vizitë të ministrit serb për Informacion dhe Telekomunikacion, Dejan Ristiq, si kundërpërgjigje ndaj vendimeve të ngjashme të Serbisë.

Lajmin e ka konfirmuar për Telegrafin Qëndresa Fazliu nga Zyra për Komunikim në Ministrinë e Punëve të Jashtme dhe Diasporës (MPJD).

Sipas MPJD-së, ky vendim është marrë pas veprimeve të përsëritura të Qeverisë së Serbisë për të refuzuar vizitat e zyrtarëve të lartë të Kosovës, veçanërisht në komunat e Preshevës, Medvegjës dhe Bujanocit.

“Ky qëndrim i Serbisë është ashpërsuar muajve të fundit dhe bie ndesh me Marrëveshjen e Brukselit për vizitat zyrtare”, thotë kjo ministri.

Ristiq kishte planifikuar të qëndronte në Kosovë nga 24 deri më 26 dhjetor.

Më herët, më 25 dhjetor, MPJD-ja njoftoi se Serbia ia kishte refuzuar ministrit të Punëve të Brendshme të Kosovës, Xhelal Sveçla, kërkesën për një vizitë dyditore në jug të Serbisë, në komunat me shumicë shqiptare.

Sveçla kishte planifikuar të vizitonte Preshevën, Medvegjën dhe Bujanovcin më 23 dhe 24 dhjetor, për t’u takuar me përfaqësues të Këshillit Kombëtar të Shqiptarëve të Luginës. Por, Serbia e ka refuzuar kërkesën, për shkak të qëndrimeve dhe veprimeve të tij, të cilat, sipas Beogradit, janë kundër komunitetit serb dhe normalizimit të raporteve midis dy vendeve.

MPJD-ja ka theksuar se Serbia, në dy vitet e fundit, i ka refuzuar vazhdimisht vizitat e zyrtarëve të lartë të Kosovës, përfshirë ministrin e Kulturës, Hajrulla Çeku, më 19 dhjetor, dhe ministren e Jashtme, Donika Gërvalla, më 27 shkurt.

MPJD e Kosovës i ka cilësuar këto veprime si përpjekje të Serbisë për të mbajtur tensionet në një nivel të lartë dhe për të shkaktuar konflikte.

“Aktet terroriste në Banjska dhe Ibër-Lepenc janë manifestimi më i dukshëm i këtyre synimeve nga ana e Serbisë,” thuhet në deklaratë.

Edhe Kosova, nga ana e saj, ka refuzuar kërkesa për vizita të zyrtarëve serbë.

Në maj të këtij viti, Kosova nuk ia kishte lejuar vizitën në Kosovë patriarkut serb Porfirije dhe disa priftërinjve të tjerë nga Serbia. Po në maj, kërkesa për të vizituasr Kosovën i është refuzuaredhe shefit të Zyrës për Kosovën në Qeverinë e Serbisë, Petar Petkoviq.

Çështja e vizitave zyrtare mes Kosovës dhe Serbisë rregullohet me një marrëveshje të arritur në kuadër të dialogut që ndërmjetësohet nga Bashkimi Evropian. Procedurat për këto vizita kërkojnë paralajmërim përmes zyrtarëve ndërlidhës dhe autorizim nga autoritetet përkatëse.

(Telegrafi)