Berlin, 11 shkurt 2025 – Kosova dhe Shqipëria kaë shënuar përparim në lehtë në luftimin e korrupsionit gjatë vitit 2024, sipas Indeksit të Perceptimit të Korrupsionit, të përpiluar nga organizata ndërkombëtare, Transparency International.
Sipas raportit të publikuar më 11 shkurt, Kosova është renditur në mesin e shtatë shteteve që në pesë vjetët e fundit kanë përmirësuar shifrat e tyre në raportin e kësaj organizate. Ajo është vlerësuar me 44 pikë, për dallim nga 41 pikë sa kishte më 2023.
Edhe Shqipëria ka shënuar rritje me 42 pikë, nga 37 sa ka pasur në vitin paraprak, ndonëse Qeveria shqiptare është përmendur si shembull kur injorohet interesi publik dhe shfrytëzohen legjislacione speciale për të shmangur kontrollin në investime me shuma të mëdha.
Ajo përmendet për arritjen e marrëveshjeve për investime, në vlerë të miliarda dollarëve, që mund të rrezikojnë shkatërrimin e shtratit të lumit Vjosa.
Megjithatë, Shqipëria lavdërohet për punën e Prokurorisë së Posaçme (SPAK) për, siç thuhet në raport, kthimin e besimit të njerëzve në drejtësi, pas ngritjes së padive për ish-ministra, pjesëtarë të parlamentit dhe zyrtarë tjerë.
“SPAK vazhdon të hetojë ish-presidentin, ish-kryeministrin dhe zyrtarë tjerë publikë të nivelit të lartë”, është thënë në raport, si referencë për ish-presidentin Ilir Meta, ish-kryeministrin Sali Berisha dhe ish-zëvëndëskryeministrin Arben Ahmetaj.
Nga vendet tjera të rajonit, Maqedonia e Veriut ka shënuar rënie, duke u vlerësuar me 40 pikë, dy më pak se vitin 2023, Serbia ka shënuar po ashtu rënie, me 35 pikë, një më pak se vitin paraprak, Bosnje-Hercegovina është vlerësuar me 33 pikë, dy më pak se më 2023, ndërsa Mali i Zi është vlerësuar njëjtë sikurse vitin paraprak, me 46 pikë.
Indeksi radhit çdo vit 180 shtete dhe territore të botës në bazë të nivelit të perceptuar të korrupsionit në sektorin publik. Ai përdor një metodologji pikësh, sipas së cilës zero tregon për një vend shumë të korruptuar, ndërsa 100 për një vend të pastër nga kjo dukuri.
Në krye të listës së këtij Indeksi, si rëndom, janë Danimarka, Finlanda dhe Singapori, ndërsa në fund, si vende me probleme të thella në luftim të korrupsionit, janë Sudani i Jugut, Somalia, Venezuela dhe Siria.
Shumica e vendeve të Evropës Lindore dhe Azisë Qendrore dështojnë që të ndëshkojnë korrupsionin e nivelit të lartë, apo edhe të ruajnë integritetin gjyqësor, pasi degët tjera të Qeverisë dhe grupet e interesit shtrijnë ndikimin e tyre.
Këto rajone vazhdojnë të kenë mesataren më të ulët në vendet që mbulon Indeksi – 35 nga 100 – për luftim të korrupsionit.
(r.m.)