Prishtinë, 13 mars 2025 – Ish-presidenti i Kosovës, Hashim Thaçi, ka arritur për një vizitë të shkurtër në Kosovë, me leje të përkohshme nga Gjykata Speciale në Hagë.
Nga aeroporti i Prishtinës ai shkoi direkt për ta vizituar babain e tij në Qendrën Klinike Universitare të Kosovës (QKUK) në Prishtinë,
Mediet në Kosovë e regjistruan momentin kur Thaçi, i shoqëruar nga policë të EULEX-it, po hynte në klinikën e sëmundjeve interne. Ai i përshëndeti me dorë një grup qytetarësh që ishin grumbulluar para hyrjes në këtë klinikë, të cilën brohoritën emrin e tij, në shenjë mbështetjeje.
Thaçi u përshëndet së largu me mbështetës të tij edhe gjatë daljes nga klinika, pas vizitës së babait të tij, gjendja shëndetësore e të cilit njoftohet se është përkeqësuar më shumë ditët e fundit.
Gjykata Speciale në Hagë shpjegoi se vizita e Thaçit është miratuar për arsye humanitare bindëse.
“Trupi Gjykues dhe Gjykatësja e Procedurës Paraprake kanë udhëzuar Zyrën Administrative që të menaxhojë një vizitë nën mbikqyrje në Kosovë të Hashim Thaçit për ta takuar babain e tij. Gjatë kësaj vizite nën mbikqyrje, i akuzuari mbetet në paraburgim të Dhomave të Specializuara”, thuhet në njoftimin e Speciales.
Zyra për informim e lësaj gjykate, në një përgjigje për Telegrafin, ka kujtuar se kjo është hera e tretë që z. Thaçi i miratohet kërkesa për ta vizituar Kosovën për arsye të fuqishme humanitare.
“Në total, kjo është vizita e 13-të në paraburgim e menaxhuar nga Regjistri për një të paraburgosur në Kosovë mbi baza humanitare”, thuhet në përgjigjen e Speciales
Thaçi ndodhet në Qendrën e Paraburgimit në Hagë që nga nëntori i vitit 2020. Ai është duke u gjykuar për krime lufte si dhe së fundi iu është ngritur një aktakuzë kundër administrimit të drejtësisë.
(r.m.)