Prishtinë, 26 mars 2025 – Republika e Kenias është bërë shteti i 118-të që ka njohur zyrtarisht pavarësinë dhe sovranitetin e Republikës së Kosovës.
Vendimi i firmosur nga presidenti i Kenias, William Ruto, është dorëzuar zyrtarisht në Presidencën e Kosovës.
Lajmin e konfirmoi presidentja Vjosa Osmani të mërkurën. Ajo e cilësoi këtë akt si dëshmi të fuqishme të mbështetjes së Kenias për lirinë, pavarësinë dhe integritetin territorial të Kosovës.
“Njohja e Kenias është një njohje e sakrificës shekullore të popullit të Kosovës për liri dhe drejtësi. Në emër të institucioneve dhe qytetarëve të Kosovës, i shpreh falënderime të sinqerta Presidentit Ruto për këtë vendim të drejtë dhe të rëndësishëm, si dhe qytetarëve kenianë që mbështetën këtë hap diplomatik”, ka shkruar Osmani në Facebook.
Ajo theksoi se gjatë viteve të fundit ka zhvilluar takime të rëndësishme me presidentin Ruto dhe se një nga temat kryesore të bisedimeve ka qenë njohja e Kosovës.
“Presidenti Ruto vazhdimisht ka siguruar popullin e Kosovës se vendimi për njohje do të merret shpejt, bazuar në të drejtën ndërkombëtare dhe në sakrificën e gjatë të popullit tonë”, ka shkruar ajo.
“Me këtë vendim, Kosova vazhdon të forcojë pozitat e saj në arenën ndërkombëtare, duke synuar thellimin e marrëdhënieve me Kenian në fusha të ndryshme”, ka shkruar presidentja Osmani.
Ajo bëri të ditur se shumë shpejt pritet vendosja e marrëdhënieve diplomatike mes dy shteteve dhe ndërtimi i një partneriteti të fortë dhe afatgjatë.
Presidentja Osmani ka shprehur një falënderim të veçantë edhe për ish-presidentin dhe ish-ministrin e Punëve të Jashtme të Kosovës, Behgjet Pacolli, i cili është angazhuar për njohjen e pavarësisë së Kosovës nga Kenia.
(r.m.)