Kremtimi i 110-vjetorit të Ditës së Pavarësisë së Shqipërisë në New Jersey, organizuar nga Aleanca Shqiptare u moderua nga poetja Arjana Fetahu Gaba. Ceremonia u transmetua drejtpërdrejtë nga televizioni “Report TV” në Shqipëri
Nga Beqir SINA
New Jersey, 29 nëntor 2022
GARFIELD, New Jersey – Të dielën më 27 nëntor, në qytetin Garfield në New Jersey, në Parkun “Nënë Tereza”, aty ku është vendosur Statuja e të Shenjtës “Nëna Tereza”, përkrah shtizës së flamurit të SHBA-së, Aleanca Shqiptare në New Jersey me President Alban Gaba, ngriti flamurin kuq e zi.
Në ceremoninë e lartësimit së flamurit në këtë park mori pjesë kryetari i bashkisë së New Jersey-t, Richard Rigolosio.
Të ftuar nderi ishin gjithashtu Josepf Delaney, nënkryetar i bashkisë Garfield, Thomas J. Duch administrator dhe këshilltar i Qarkut Bergen County-t, Alejandina (Sugar) Banch këshilltare, Romi Herrera Këshilltar, Pawel Maslag këshilltar, Erin Delaney menaxhere e qytetit Garfield, Frank Schillari Sherif i Hudson County-t, Anthony Curetoni Sherif i Bergen County-t, Vezir Sela Sherif i Bergen County-t, Richard Berdnik Sherif i Passaic County-t, Atli Sela Sherif Detektiv i Passaic County-t, Lirim Kaba Sherif Komandant i Passaic Count-t, Hadis Sela Sherif Hudson Count-t, Azmi Toska Sherif Hudson County-t, Almat Asani Sherif Hudson Count-t, Violeta Berisha këshilltare e qytetit Fairview, Serxhenti Jeff Stewart Komandant i Divizionit të Çështjeve të Komunitetit nga Policia e qytetit të Garfield-it, Lejtnant policer i Hoboken New York, Edmond Drishti, Tahir Kukaj Chaplin Imam, Arian Spasse, Koordinator Politik i Misionit të Përhershëm të Shqipërisë në Kombet e Bashkuara dhe shoqata e motorristëve “Sons of Illyrians” (“Bijtë e Ilirëve”).
Në fjalën e tij, kryebashkiaku i Garfield-it, Rigoglosio pasi uroi shqiptarët për ditën e Pavarësisë, falënderoi komunitetin shqiptar për kontributin e tyre dhe premtoi se do t’i mbështesë kurdoherë shqiptarët.
“Do t’ju falënderoja që keni ardhur sot. Sot ngremë flamurin shqiptar për Ditën e Pavarësisë së Shqipërisë! Është një nder për qytetin dhe Këshillin Bashkiak që të mbështesim komunitetin shqiptar, familjet dhe bashkëkombasit e tyre! Urime dhe gëzuar Ditën e Flamurit”, – tha kryetari i bashkisë së qytetit Richard Rigoglosio.
Ndërkaq, Frank Schillari Sherif i Hudson County-t tha se ishte shumë i lumtur dhe i vlerësuar që merrte pjesë në ceremoninë e celebrimit të ditës së pavarësisë së Shqipërisë.
“Edhe gruaja ime, – theksoi ai, – është shqiptare. Shumë nga sherifët e mi janë gjithashtu shqiptarë. Ne vijmë këtu çdo vit dhe këtë herë festojmë 110-vjetorin e pavarësisë. Jemi të nderuar që ndodhemi në sheshin dhe shtatoren e “Nënë Terezës”. Dua t’u falenderoj të gjithëve për organizimin dhe urime festa!”-tha ai, ndërsa u dëgjua duke u përcjellë me duartrokitje ndërhyrja e Alban Gabës, president i “Albanian Alliance” (“Aleanca Shqiptare e Nju Xhersit), “ne ju themi që jeni dhëndërr shqiptar”.
Festimi i 110-vjetorit të pavarësisë së Shqipërisë, organizuar pikërisht nga Aleanca Shqiptare e New Jersey- vazhdoi me drekën e e shtruar në lokalin e njohur “Venetian” në Garfield.
Dreka festive u hap me këndimin e dy himneve kombëtarë amerikan dhe shqiptar.
Kremtimi i 110-vjetorit të Ditës së Pavarësisë së Shqipërisë në New Jersey, organizuar nga Aleanca Shqiptare u moderua nga poetja Arjana Fetahu Gaba.
Në moderim u vijuan përshëndetjet nga Brisilda Gaba, Aleksandër Gaba, Realda Haxhifejzoviq, Jon Gaba.
U lexuan dy poezitë e poetes Arjana Fetahu Gaba nga vetë autorja si dhe nga Dejana Keraj dhe më tej vazhdoi sfilata e modës e krijueses Gerta Cami me vogëlushet me veshjet kuq e zi nga trojet etnike të Shqipërisë.
Të ftuar nderi ishin gjithashtu diplomatët shqiptarë nga Misioni i Shqipërisë në OKB, Arian Spasse dhe znj. Almona Bajrami.
Me këtë rast pasi foli për kontributin e dy detektivëve shqiptarë nga Departamenti i Policisë së New Jersey-t dhe përkushtimin e tyre, dy vëllezërve shqiptarë struganë, Atli Sela, Vezir Sela, zoti Rigoglioso, u dorëzoi nga një Mirënjohje të Aleancës Shqiptare në New Jersey.
Me Mirënjohje u nderua edhe Imam Tahir Kukaj nga Qendra Islame në Staten Island New York.
Orkestra e drejtuar nga Dritan “Tan” Papa keyboard, Arbër Gega klarinetë-saksofon, këngëtarët Mimoza Gjikola dhe Flamur Biçaku, performuan në festën kuqezi, ndërsa, të gjithë pjesëmarrësit me të ftuarit e nderuar dolën e vallëzuan në grupe deri vonë në mbrëmje.
Ceremonia u shoqërua me sfilatën me veshjet për fëmijë stolisur me dizajnin e simboleve tona kombëtare, kuq e zi dhe flamurin e Kosovës.
Njera prej vashave në sfilatë e veshur me një fustan me ngjyrat dhe hartën e Kosovës, recitoi poezinë e shkruar nga Arjana Fetahu Gaba kushtuar ditës së Flamurit, 28 Nëntorit 1912.
“Është nder i madh për mua dhe ndihem i privilegjuar që të gjithë, në këtë ditë të rëndësishme të Pavarësisë së Shqipërisë, të jemi mbledhur përsëri së bashku për të festuar 110-vjetorin e Pavarësisë së shtetit Shqiptar”, – tha presidenti Alban Gaba.
Ai falenderoi zyrtarët e lartë vendorë të bashkisë dhe policisë të pranishëm, aktivistët e shquar dhe gazetarët Beqir Sina dhe Denion Ndrenika i televizionit “Report TV” në Shqipëri dhe gazetës “Illyria” në SHBA, që siç u shpreh “kanë kontribuar dhe bërë gjëra të mëdha për komunitetin shqiptar në shtetin e Nju Xhersit, veçanërisht në qytetin me zemër të madhe të Garfield-it”.
Me këtë rast ai foli me mirënjohje për mbështetjen që autoritetet vendore i kanë dhënë komunitetit shqiptar në Garfield dhe për nderimin që ata i bëjnë festës së flamurit kuq e zi.
Në mbyllje zoti Gaba, ftoi pjesëmarrësit të festojnë së bashku, të falnin sa më shumë dashuri dhe ndjeshmëri për njeri-tjetrin, Gëzuar Ditën e Pavarësisë së shtetit shqiptar.
“Zoti e bekoftë Shqipërinë!
Zoti e bekoftë qytetin e Garfield-it!
Zoti i bekoftë Shtetet e Bashkuara të Amerikës!”, – tha presidenti i Aleancës Shqiptare, Alban Gaba.
