Sana / Uashington, 17 tetor 2024 – Ushtria amerikane ka kryer sulme ajrore me bombardues B-2 ndaj bunkerëve të rebelëve Huthi të Jemenit të enjten në mëngjes, thanë zyrtarët amerikanë.
Nuk është ende e qartë se çfarë dëmesh kanë shkaktuar këto bombardime.
Në të kaluarën nuk është raportuar për përdorimin e bombarduesve B-2 për sulme ndaj rebelëve Huthi, të cilët ka kohë të gjatë që i sulmojnë anijet në Detin e Kuq për shkak të luftës në Rripin e Gazës mes Izraelit dhe Hamasit – grupit palestinez të shpallur organizatë terroriste nga SHBA-ja dhe BE-ja.
Kanali satelitor i lajmeve i Huthit, al-Masirah, raportoi për sulme ajrore rreth kryeqytetit të Jemenit, Sana, të cilin ky grup e ka nën kontroll prej vitit 2014. Ai gjithashtu raportoi për sulme rreth bastionit të Huthit në Sada. Ky kanal nuk tregoi nëse kishte dëme apo viktima.
Sekretari amerikan i Mbrojtjes, Lloyd Austin, tha në një deklaratë se bombarduesit B-2 kishin në shënjestër “pesë vende të fortifikuara nëntokësore për ruajtjen e armëve në zonat e kontrolluara nga Huthi në Jemen”.
Ky sulm duket se gjithashtu ishte paralajmërim tërthor për Iranin, mbështetësin kryesor të rebelëve Huthi, i cili ka sulmuar Izraelin me raketa balistike dy herë gjatë vitit të kaluar. Bombarduesit B-2 do të përdoreshin në çdo sulm amerikan ndaj objekteve të fortifikuara bërthamore të Iranit si, Natanz ose Fordo, duke qenë se është i vetmi avion luftarak i cili mund të hedhë bomba GBU-57.
“Ky ishte një demonstrim i veçantë i aftësive të Shteteve të Bashkuara për t’i goditur objektet që armiqtë tanë përpiqen t’i mbajnë larg arritjes sonë, pavarësisht se sa thellë janë futur, fortifikuar apo blinduar”, tha Austin.
Komanda Qendrore e SHBA-së tha në një deklaratë se vlerësimet fillestare tregojnë se nuk ka civilë të vrarë.
Deti i Kuq është bërë fushëbetejë për anijet tregtare prej se rebelët Huthi filluan të kryejnë sulme ndaj anijeve që kalojnë përmes rrugës ujore, nëpër të cilën dikur kalonin mallra në vlerë 1 trilion dollarë në vit.
Huthët kanë sulmuar më shumë se 80 anije tregtare me raketa dhe dronë prej kur filloi lufta në Gaza në tetor 2023. Ata kanë kapur një anije dhe kanë fundosur dy gjatë fushatës së tyre, si pasojë e të cilës gjithashtu janë vrarë katër detarë. Raketa dhe dronë të tjerë janë rrëzuar nga një koalicion i udhëhequr nga SHBA-ja në Detin e Kuq, ose kanë dështuar të arrijnë objektivat e tyre, të cilat përfshijnë anije ushtarake perëndimore.
Rebelët pretendojnë se ata kanë në shënjestër anijet e lidhura me Izraelin, SHBA-në ose Mbretërinë e Bashkuar, në përpjekje për t’i dhënë fund luftës së Izraelit kundër Hamasit në Gazë. Megjithatë, shumë nga anijet e sulmuara kanë pak ose aspak lidhje me konfliktin.
Bombarduesi B-2, i cili për herë të parë u përdor në luftime në luftën e Kosovës më 1999, përdoret rrallëherë nga ushtria amerikane në luftime, pasi një avion i tillë kushton rreth 1 miliard dollarë.
Ky avion ka hedhur bomba në Afganistan, Irak dhe Libi.
(Radio Evropa e Lirë)