Kiev, 2 shkurt 2023 – Presidentja e Komisionit Evropian Ursula von der Leyen dhe një delegacion prej 15 komisionerësh janë në Kiev për një Samit të përbashkët me qeverinë e Ukrainës.
“Ndihem mirë që u ktheva në Kiev, hera ime e katërt që nga pushtimi i Rusisë,” shkroi von der Leyen në Twitter pas mbërritjes në kryeqytetin ukrainas me tren.
“Kësaj radhe, me ekipin tim të komisionerëve,” shtoi ajo. “Ne jemi këtu së bashku për të treguar se BE-ja qëndron pranë Ukrainës si kurrë më parë. Dhe për të thelluar më tej mbështetjen dhe bashkëpunimin tonë.”
Shefi i politikës së jashtme të BE-së Josep Borrell dhe komisioneri i zgjerimit Oliver Varhelyi janë midis anëtarëve të delegacionit.
Von der Leyen u takua me presidentin ukrainas Volodymyr Zelenskiy më 2 shkurt, ndërsa presidenti i Këshillit Evropian Charles Michel do të arrijë në Samitin më 3 shkurt.
Samiti BE-Ukrainë në kryeqytetin ukrainas do të përforcojë mbështetjen e BE-së për Ukrainën përballë pushtimit të Rusisë dhe do të fokusohet në reformat e nevojshme që Ukraina të përparojë drejt anëtarësimit në BE.
BE-ja ka dhënë tashmë 50 miliardë euro ndihmë për Ukrainën dhe ky takim do të thellojë më tej mbështetjen dhe bashkëpunimin e BE-së.
Temat që do të diskutohen përfshijnë rindërtimin e Ukrainës dhe aspiratat e saj për anëtarësim në BE.
Vizita e komisionerëve të lartë në Ukrianë vjen një ditë pasi shtëpitë e disa zyrtarëve të rangut të lartë u bastisën nga agjentë anti-korrupsion, aksioni i dytë i tillë brenda një jave.
Presidenti Zelensky është zotuar të çrrënjosë korrupsionin nga institucionet e Ukrainës.
(REL)