Uashington, 15 korrik 2024 – Ish Presidenti Donald Trump njoftoi të hënën se Senatori James David Vance do të jetë kandidat i tij për zëvendës-president të Shteteve të Bashkuara në zgjedhjet presidenciale të nëntorit.
“Në postin e nënpresidentit, J.D. do të vazhdojë të luftojë për Kushtetutën tonë, do të mbështesë trupat dhe do të bëjë gjithçka që mundet për të më ndihmuar që ta BËJMË AMERIKËN MADHËSHTORE SËRISH”, shkroi zoti Trump në platformën e tij “Truth Social”.
Zoti Trump e bëri njoftimin në fillim të kuvendit kombëtar republikan, dy ditë pasi i mbijetoi një atentati.
Më herët të hënën, zoti Trump shënoi një fitore të madhe ligjore, pasi një gjykatëse federale hodhi poshtë një nga çështjet e ngritura kundër tij.
Gjykatësja Aileen Cannon tha në vendimin e saj se prokurori i posaçëm Jack Smith, i cili drejton hetimin, ishte emëruar në mënyrë të paligjshme në këtë rol dhe se ai nuk e kishte autoritetin ligjor për të ngritur një padi të tillë. Në urdhrin prej 93 faqesh të gjykatëses Cannon thuhet se prokurori i posaçëm duhet të ishte emëruar me miratimin e Kongresit.
Zoti Trump do të pranojë zyrtarisht të enjten emërimin e Partisë Republikane për të sfiduar Presidentin Joe Biden në zgjedhjet e 5 nëntorit.
Pas sulmit me armë, përzgjedhja e zotit Trump mbart dukshëm më shumë peshë.
Zoti Trump ka pohuar vazhdimisht se do të përqëndrohej tek përzgjedhja e dikujt që ishte i kualifikuar për të marrë detyrën si komandant i përgjithshëm.
“Është e domosdoshme të përzgjedhësh dikë që mund të jetë i mirë për çdo rast, për çdo rast të tmerrshëm”, tha ai në muajin maj gjatë një interviste për programin radiofonik “The Clay Travis & Buck Sexton Show”.
Në një tjetër intervistë për gazetaren e rrjetit ‘Fox News’, Harris Faulkner e cila u regjistrua disa orë përpara tubimit të tij në Battlër të Pensilvanisë, zoti Trump u pyet se ku ndodhej me procesin e përzgjedhjes së kandidatit për nënpresident e nëse vendimmarrja e tij do të ndryshonte nëse Presidenti Joe Biden, do të tërhiqej nga gara.
“Është një pozitë shumë e rëndësishme, veçanërisht nëse diçka e keqe ndodh”, tha zoti Trump. “Kjo është më e rëndësishmja, nëse mund të ndodhë diçka e keqe”.
Para sulmit me armë, zoti Trump e kishte bërë të qartë se donte ta shpallte emrin në mënyrë dramatike në kuvend, çka sipas tij do ta bënte më “interesant” dhe “më emocionues” procesin.
“Është si një veriant shumë i sofistikuar i ‘The Apprentice'”, tha ai në një intervistë radiofonike javën e kaluar, duke iu referuar një programi televiziv që ai ka drejtuar dikur, ku zoti Trump përzgjidhte mes kandidatësh ata që do të punonin për kompaninë e tij.
Zoti Trump dhe organizatorët e kuvendit kanë thënë se axhenda e tij nuk do të ndryshojë, por do të vazhdojë siç ishte planifikuar pavarësisht sulmit.
Në një postim në faqen e tij të mediave sociale zoti Trump shkruante se ai nuk mund të lejojë që “një person që sulmon me armë ose një vrasës i mundshëm, të imponojë ndryshimin e orarit, apo ndonjë gjë tjetër”.
“Në këtë moment është më e rëndësishme se kurrë që të qëndrojmë të bashkuar dhe të tregojmë karakterin tonë të vërtetë si amerikanë, duke mbetur të fortë dhe të vendosur dhe duke mos lejuar që e keqja të fitojë”, shkruante ai.
Zoti Trump zhvilloi takime në ditët para sulmit me pretendentët kryesorë për të marrë pozitën e kandidatit për nënpresident. Një prej personave në dijeni të tyre tha se gjatë takimeve nuk ishte bërë asnjë premtim apo nuk ishte ofruar asgjë.
Pritja e zotit Trump deri tek kuvendi për të zgjedhur numrin dy të tij vjen më vonë se zakonisht sa i takon viteve të fundit, por vështirë se është e pashembullt.
Në vitin 1980, Ronald Reagan negocioi me ish Presidentin Gerald Ford për orë të tëra gjatë kuvendit republikan në Detroit, por vendosi që George H.W. Bush të ishte numri dy i tij, kur negociatat dështuan. Vendimi erdhi më pak se 24 orë para se të pranonte zyrtarisht emërimin nga partia.
Vetë zoti Bush priti deri në kuvendin republikan të vitit 1988 që u mbajt në Nju Orlins përpara se të ‘trondiste’ shumë prej pjesëmarrësve – si dhe disa prej këshilltarët kryesorë të tij, duke zgjedhur senatorin pak të njohur të Indianës, Dan Quayle, si numrin 2 të tij, në vend të një kandidati me të njohur e më të pranuar gjerësisht.
Që atëherë, megjithatë, ka qenë traditë që të zgjidhet një kandidat pak përpara hapjes së kuvendit së partisë.
Në vitin 2008, senatori i Arizonës, John McCain, në një përpjekje për t’i dhënë hov garës së tij kundër demokratit Barack Obama, zgjodhi guvernatoren pak të njohur të Alaskës, Sarah Palin, pak përpara se të hapej kuvendi republikan në Minesota. Ai pati një rritje në anketime, por që nuk zgjati shumë.
Joe Biden, emëroi senatoren e atëhershme të Kalifornisë, Kamala Harris si kandidate për nënpresidente, gjashtë ditë përpara se Partia Demokrate të çelte kuvendin që u mbajt kryesisht ‘online’ për shkak të pandemisë së koronavirusit.
(Zëri i Amerikës)