Prishtinë, 22 gusht 2024 – Drejtori i Agjencisë Qendrore të Inteligjencës (CIA), William Burns, ka qëndruar të enjten në Kosovë, në një vizitë të paparalajmëruar dhe pa publicitet.
Z. Burns është parë duke hyrë në ndërtesën e Presidencës së Kosovës dhe duke dalë prej saj, pas njëfarë kohe.
Nga ndërtesa er Presidencës së Kosovës është parë duke dalë edhe ambasadori i Shteteve të Bashkuara të Amerikës në Kosovë, Jeffrey Hovenier.
Radio Evropa e Lirë raportoi se z. Burns është takuar me Presidenten e Kosovës, Vjosa Osmani, ndërsa në takim ka qenë i pranishëm edhe drejtori i Agjencisë së Kosovës për Inteligjencë (AKI), Petrit Ajeti.
Asnjëra nga palët nuk është deklaruar rreth përmbajtjes së takimit.
Policia e Kosovës i ka urdhëruar gazetarët të largohen nga hapësirat para ndërtesave qeveritare, pa dhënë ndonjë shpjegim.
Vizita e shefit të CIA-s në Kosovë, e cila realizohet pas vizitave në Bosnjë e Hercegovinë dhe në Serbi, nuk është paralajmëruar. Radio Evropa e Lirë ka bërë të ditur se ka pyetur në Ambasadën amerikane në Prishtinë, në Presidencën e Kosovës dhe në Ministrinë e Punëve të Brendshme, por nuk ka marrë asnjë konfirmim për këtë vizitë.
Por, avioni i ushtrisë amerikane, me të cilin besohet se z. Burns ka udhëtuar në Bosnjë e Hertcegovinë dhe në Serbi, të enjten në mesditë është parë në Aeroportin Ndërkombëtar të Prishtinës.
Avioni i ushtrisë amerikane në Aeroportin e Prishtinës më 22 gusht 2024
Në mesditë ekipi i Radios Evropa e Lirë e ka fotografuar aeroplanin para zonës “VIP” të aeroportit.
Sipas ueb-faqes për gjurmimin e fluturimeve, Flightradar, ky aeroplan ka udhëtuar sot nga Beogradi në Prishtinë përmes hapësirës ajrore të Rumanisë, të Bullgarisë dhe të Maqedonisë së Veriut.
Rruga që përshkroi avioni ushtarak amerikan nga Beogradi në Prishtinë më 22 gusht
Gazetarët e Radios Evropa e Lirë e kanë parë një autokolonë të shoqëruar nga Policia e Kosovë duke u larguar nga zona “VIP” e aeroportit.
Të martën, më 20 gusht, z. Burns qëndroi në Sarajevë, ku u takua me udhëheqës të inteligjencës, me anëtarët e Presidencës dhe me ministrin e Jashtëm.
Një zyrtar i Qeverisë amerikane, i cili foli në kushte anonimiteti, i tha Radios Evropa e Lirë se arsye për vizitën e shefit të CIA-s në Sarajevë, ndër të tjera, ishin retorika dhe veprimet separatiste të presidentit prorus të Republikës Sërpska, Millorad Dodik, dhe të qeverisë së këtij entiteti.
Të mërkurën, më 21 gusht, Shefi i CIA-s qëndroi në Beograd. Sipas medieve serbe, ai është takuar me zyrtarë të shërbimit secret serb, por kjo nuk u konfirmua nga zyrtarët as në Serbi dhe as në Shtetet e Bashkuara.
Ka raportime se vizita e drejtorit të CIA-s, William Burns, në vendet e Ballkanit Perëndimor është nxitur nga informacionet se Rusia ka shtuar përpjekjet për destabilizimin e rajonit, por ato nuk janë konfirmuar deri më tash. Zëvendëskryeministri i Serbisë, Aleksandar Vulin, ishte në Moskë para disa ditësh, ku e falënderoi shërbimin secret rus për “informacionin” se në Serbi gjoja po përgatitej një grusht shteti, I nxitur nga Perëndimi.
Vulin ka qenë shef i shërbimit sdekret të Serbisë. Ai është përfshirë në listën e zezë të Shteteve të Bashkuara të Amerikës për shkak të raporteve shumë të afërta me Moskën dhe për shkak të politikave luftënxitëse në rajon.
William Burns, i cili ka qenë ambasador i SHBA-së në Rusi, është një ndër figurat më të rëndësishme të administrates së presidentit amerikan, Joe Biden. Ai është edhe anëtar i kabinetit presidencial të Shtëpisë së Bardhë.
Në krye të CIA-s është emëruar në janar të vitit 2021.
(r.m.)