Kabul, 26 gusht 2021 – Të paktën dy shpërthime kanë ndodhur të enjten pranë aeroportit të Kabulit.
Shpërthimi i parë ka ndodhur pranë njërës nga hyrjet kryesore të aeroportit, ndërsa shpërthimi i dytë ka ndodhur pranë hotelit “Baron” që ndodhet afër aeroportit.
Ende nuk dihet numri i viktimave dhe të plagosurve. Sipas raportimeve të para, në shpërthimin e parë janë vrarë së paku 13 persona, ndërsa në shpërthimin e dytë janë vrarë së paku 2 persona.
Pentagoni njoftoi se në shpërthimin e dytë mesin e të plagosurve ka edhe pjesëtarë të ushtrisë amerikane dhe civilë amerikanë.
Sekretari i shtypit të Pentagonit John Kirby konfirmoi se në shpërthimin e dytë, pranë hotelit “Baron”, janë plagosur edhe disa shtetas amerikanë, ushtarë dhe civilë.
We can confirm that the explosion at the Abbey Gate was the result of a complex attack that resulted in a number of US & civilian casualties. We can also confirm at least one other explosion at or near the Baron Hotel, a short distance from Abbey Gate. We will continue to update.
— Maj. Gen. Patrick Ryder (@PentagonPresSec) August 26, 2021
Agjencia Associated Press citon zyrtarë rusë të kenë thënë se në sulmin vetëvrasës pranë aeroportit të Kabulit janë vrarë të paktën 2 persona dhe janë plagosur 15 të tjerë.
Një afgan, dëshmitar i shpërthimit të pare, ka thënë se ai i ka parë disa të vrarë dhe të plagosur që gjendeshin në turmën e njerëzve që prisnin jashtë hyrjes në aeroport.
Adam Khan ka thënë se disa njerëzve u mungonin gjumtyrë e pjesë të trupit. Ai ka thënë se gjendej 30 metra larg vendit të shpërthimit.
Shpërthimet e së enjtes ndodhën në kohën që vendet perëndimore po përpiqen të evakuojnë njerëzit e tyre dhe afganët që u kanë shërbyer para se Afganistani të kontrollohej nga talibanët.
Para se të ndodhnin shpërthimet, qeveritë e vendeve perëndimore paralajmëruan për rrezikun e sulmeve terroriste në aeroportin e Kabulit, ku është grumbulluar një numër i madh njerëzish që duan të largohen nga Afganistani. Qeveritë perëndimore u kërkuan shtetasve të tyre që gjenden në këtë zonë të zhvendosen në një vend më të sigurtë.
(r.m.)