Uashington, 6 shkurt 2024 – Donald Trump nuk ka imunitet presidencial dhe mund të ndiqet penalisht në lidhje me akuzat për komplot me qëllim përmbysjen e rezultatit të zgjedhjeve të vitit 2020.
Gjykata e Apelit në Uashington i hodhi poshtë të martën pretendimet e Trump se ai është imun nga ndjekja penale për aktet e dyshuara kriminale që kreu si president në përpjekje për të përmbysur zgjedhjet e vitit 2020 në një zinxhir ngjarjesh që çuan në sulmin e 6 janarit në Kapitol.
Avokatët e Trump argumentuan se ish presidentët mbrohen nga ndjekja penale për veprimet e tyre zyrtare nëse nuk janë fajësuar nga Dhoma e Përfaqësuesve. Megjithatë, gjykata e hodhi poshtë këtë pretendim, duke nënvizuar pasojat e mundshme të një imuniteti kaq të gjerë.
Ish-presidenti pritet të apelojë kundër vendimit, që do të thotë se çështja mund të shkojë përfundimisht në Gjykatën e Lartë, ku konservatorët kanë një shumicë 6-3.
Rasti është një nga katër ndjekjet penale me të cilat përballet Trump, edhe pse ai mbetet kandidati kryesor i supozuar për nominimin presidencial republikan.
Aktakuza, e ngritur nga Prokurori i Posaçëm Jack Smith, akuzon Trump për presion ndaj ligjvënësve të shtetit, zyrtarëve të Departamentit të Drejtësisë dhe nënpresidentit të atëhershëm Mike Pence për të penguar certifikimin e rezultatit të zgjedhjeve duke përdorur pretendime të rreme për mashtrim të votuesve.
(abcnews.al)