Izraeli ka kryer sulme të ashpra ajrore në jug të Libanit dhe grupi militant shiit, Hezbollah, tha se ka kryer sulme me dronë dhe raketa ndaj caqeve izraelite më 8 maj, përderisa ministri izraelit i Mbrojtjes paralajmëroi për një “verë të nxehtë” në rajonin kufitar.
Sulmet izraelite kanë vrarë tre luftëtarë palestinezë të Brigadës Kuds, krahut të armatosur të lëvizjes së Xhihadit Islamik, tha grupi. Hezbollahu tha se po ashtu një luftëtar iu vra gjatë sulmeve.
Konflikti mes Hezbollahut dhe Libanit ka nisur në tetor, paralelisht me luftën në Gazë. Shkëmbimi i zjarrit, pothuajse në baza ditore, ka detyruar dhjetëra mijëra persona në dy anët e kufirit të zhvendosen, teksa janë rritur shqetësimet se konflikti mund të përshkallëzohet në një luftë më të madhe mes dy armiqve.
Ushtria izraelite tha se goditi struktura ushtarake dhe struktura të tjera që i përkisnin Hezbollahut – që mbështetet nga Irani – në tri lokacione në jug të Libanit, përfshirë edhe mbi 20 sulme ndaj caqeve të Hezbollahut në zonën e Ramjehit.
Hezbollahu tha se sulmoi me dronë selinë ushtarake të Izraelit në qytetin kufitar të Jarait dhe goditi me raketa një kazermë në Biranit. Ky grup tha se të mërkurën kreu të paktën dhjetë sulme.
Agjencia shtetërore e lajmeve në Liban tha se Izraeli ka kryer sulme ajrore ndaj 28 qytetesh dhe fshatrash në jug të shtetit, që është bastion i Hezollahut.
Për shkak të tensioneve në kufi, 60.000 banorë në jug të Izraelit janë zhvendosur nga shtëpitë e tyre. Ndërkaq, në Liban, afër 90.000 banorë janë zhvendosur për shkak të sulmeve izraelite.
Ministri i Mbrojtjes i Izraelit, Yoav Gallant, gjatë një vizite që bëri te trupat në veri të Izraelit, tha se misioni nuk ka përfunduar.
“Kjo verë do të jetë verë e nxehtë”, tha ai në një video-mesazh të publikuar nga zyra e tij.
Ai tha se kërkohet ose një marrëveshje diplomatike apo një zgjidhje ushtarake në mënyrë që banorët në veri të Izraelit të mund të kthehen në shtëpitë e tyre, duke porositur ushtrinë që të jetë gati.
Në prill, ushtria izraelite tha se përgatitej për një luftë të mundshme me Hezbollahun dhe plani përfshinte edhe përgatitje logjistike dhe mobilizimin e rezervistëve.
Më shumë se 250 anëtarë të Hezbollahut dhe 75 civilë janë vrarë nga sulmet izraelite në Liban që nga tetori, ndërkaq në Izrael afër 20 persona – përfshirë ushtarë dhe civilë – janë vrarë nga luftimet.
Luftimet aktuale mes Izraelit dhe Hezbollahut shënojnë armiqësinë më të keqe mes tyre që kur palët zhvilluan një luftë më 2006.
(Radio Evropa e Lirë)