Tiranë, 28 maj 2023 – Këshilli i Ambasadorëve Shqiptarë (KASH) ka reaguar lidhur me zhvillimet e fundit në pjesën veriore të Kosovës.
KASH, nërpërmjet një deklarate, ka shprehur shqetësimin lidhur me gjendjen e paqëndrueshme dhe për sigurinë në komunat me shumicë serbe në veri të Kosovës, të cilën e sheh si pasojë të “aktivitetit destabilizues e kriminal të strukturave parapolitike e paraushtarake që veprojnë në këto komuna, të mbështetura nga Beogradi, nëpërmjet agjencive të inteligjencës serbe, që po konfirmojnë dita ditës se janë proxy të shërbimeve sekrete ruse”.
KASH thekson se zbatimi i ligjit në të tërë territorin e Republikës së Kosovës është bazë themelore për funksionimin e shtetit ligjor në Kosovë dhe shpreh bindjen se Qeveria e Kosovës do të vazhdojë të punojë për qetësimin e situatës në këto komuna “në konsultim dhe koordinim të pandërprerë me miqtë e saj, BE-në dhe SHBA-të”.
Njëkohësisht, i bën thirrje faktorit ndërkombëtar që “të ruajë neutralitetin”, “të mbështesë Republikën e Kosovës që të vendosë sundimin e ligjit dhe të kushtetutës në gjithë territorin e saj” dhe të dënojë veprimet dhe provokimet nacionaliste” të Serbisë.
“Këshilli i Ambasadorëve Shqiptarë (KASH) i bën thirrje faktorit ndërkombëtar të ruajë neutralitetin dhe të mbështesë Republikën e Kosovës që të vendosë sundimin e ligjit dhe të kushtetutës në të gjithë territorin e saj, si dhe të dënojë veprimet dhe provokimet nacionaliste të botës serbe, të Serbisë e të Presidentit të saj, sikundër ndodhi edhe me deklaratat e fundit të papërgjegjshme të tij”, thuhet në deklaratën e KASH-it.
Deklarata e plotë:
Deklaratë e Këshillit të Ambasadorëve Shqiptarë (KASH) për situatën e fundit në veri të Kosovës.
28/05/2023, Tiranë
Këshilli i Ambasadorëve Shqiptarë (KASH) ka ndjekur dhe trajtuar në vijimësi situatën në veri të Kosovës. Kemi shprehur shqetësimin lidhur me paqëndrueshmërinë dhe sigurinë në komunat me shumicë serbe, si rrjedhojë e aktivitetit destabilizues e kriminal të strukturave parapolitike e paraushtarake paralele që veprojnë në këto komuna, të mbështetura nga Beogradi nëpërmjet agjencive të inteligjencës serbe, që po konfirmojnë dita ditës se janë proxy të shërbimeve sekrete ruse.
Në lidhje me zhvillimet e fundit, ritheksojmë se Republika e Kosovës është shtet sovran dhe integriteti i saj territorial është i pacënueshëm. Zbatimi i ligjit dhe funksionimi i institucioneve demokratike e ka shndrruar Republikën e Kosovës në një shembull demokracie për të gjithë rajonin dhe në një kontributore të pazëvendësueshme të stabilitetit, sigurisë dhe paqes në rajon e më gjerë.
Zbatimi i ligjit në të tërë territorin e Republikës së Kosovës është bazë themelore për funksionimin e shtetit ligjor në Kosovë, çka e bërë atë shembullin që përmendëm më lart.
KASH vlerëson profesionalizmin e strukturave të sigurisë së Republikës së Kosovës në qetësimin e situatës dhe jetësimin e hapave dhe vendimmarrjeve demokratike, institucionale e kushtetuese, të realizuara së fundmi në veriun e vendit, për çka bashkësia ndërkombëtare shprehu mbështetje të plotë.
Këshilli i Ambasadorëve Shqiptarë (KASH) shpreh bindjen se qëndrueshmëria dhe zbatueshmëria e veprimeve më se të justifikuara të qeverisë së Republikës së Kosovës, në drejtim të qetësimit të situatës në veriun e vendit do të jenë të plota e eficiente në se qeveria e Kosovës do të vijojë të jetë e angazhuar në një konsultim dhe koordinim të pandërprerë me miqtë e saj, me BE dhe SHBA.
Në të njëjtën kohë, Këshilli i Ambasadorëve Shqiptarë (KASH) i bën thirrje faktorit ndërkombëtar të ruajë neutralitetin dhe të mbështesë Republikën e Kosovës që të vendosë sundimin e ligjit dhe të kushtetutës në të gjithë territorin e saj, si dhe të dënojë veprimet dhe provokimet nacionaliste të botës serbe, të Serbisë e të Presidentit të saj, sikundër ndodhi edhe me deklaratat e fundit të papërgjegjshme të tij.
(r.m.)