Tiranë, 17 janar 2022 – Pacienti të cilit iu transplantua zemra e derrit është në gjendje shëndetësore stabile.
Kështu deklaroi Dr. Bartley Griffith, udhëheqës i ekipit që e kreu transplantin e zemrës së derrit te David Bennett, në një intervistë ekskluzive për Euroneës Albania.
Griffith tha se pacienti nuk është ende në formën e duhur, por është i lumtur që është ende gjallë.
“Sa herë e takoj, pacienti më falenderon në lot”, tha doktori.
Bartley Griffith tha se përzgjedhja e pacientit ishte rastësore dhe se ai nuk kualifikohej për një transplant standard zemre.
Pacienti zgjodhi që transplanti të kryhej, pavarësisht se nuk kishte siguri për jetën e tij.
“Transplantimi i zemrës së derrit ishte shansi i vetëm, pavarësisht rreziqeve, që nuk ishte më pak se të vazhdonte mjekimet e vetme. Ai e mori përsipër rrezikun dhe tha se edhe nëse nuk do të funksiononte, të paktën do të mësonte diçka”, u shpreh Dr Griffith.
Dr Griffith tha se kjo ka qenë ndërhyrja më e veçantë për të, gjatë karrierës mbi 40 vjeçare si kirurg, gjatë së cilës ka kryer më shumë se 4.000 operime.
“Kirurgët më kanë telefonuar, më kanë dhënë urimet dhe kanë ndjerë që ky është një hap i rëndësishëm të cilin ne ishim të përgatitur për ta bërë”, tha Dr. Griffith.
Kjo është dalja e parë live në media e dr. Bartley Griffith, pas operacionit në fjalë.
I ftuar në “Sot” ishte edhe kardiologu Edvin Prifti, i cili bëri të ditur për publikun se po bëhen pothuajse 50 vjet që shkenca mjekësore po punon për kryerjen e transplantit të suksesshëm të organeve të kafshëve te njeriu, procedurë që quhet ndryshe ksenotransplant.
“Në vitin 1963, një kirurg bëri implikimin veshkash të shimpanzesë te njeriu. Njëri nga pacientët jetoi deri në 9 muaj”, tha Prifti.
Ai tregoi se derrat që përdoren për transplant janë me origjinë artificiale dhe kanë gene të modifikuara, në mënyrë që të përshtatën me trupin e njeriut.
“Derrat që u përdoren janë me origjinë artificiale, të modifikuar. Kanë 10 gene që janë modifikuar, 6 janë gene humane që janë importuar te derri, 4 janë të derrit që janë çaktivizuar pasi njeriu nuk i ka”, shpjegoi kardiologu Prifti.
Në Amerikë kjo është hera e pare që zemra e derrit transplantohet te një njeri, në përpjekjet e fundit për t’ia shpëtuar jetën.
Mjekët në Qendrën Mjekësore të Universitetit të Maryland-it thonë se transplanti tregoi se një zemër e një kafshe të modifikuar gjenetikisht mund të funksionojë në trupin e njeriut pa refuzim të menjëhershëm.
https://euronews.al/al/programs/shqiperi/sot/2022/01/17/ekskluzive-l-kirurgu-qe-transplantoi-zemren-e-derrit-te-njeriu-flet-per-here-te-pare-pas-operacionit/