Bruksel, 23 nëntor 2022 – Kosova dhe Serbia kanë arritur marrëveshje për targat e automjeteve, të mërkurën mbrëma, në Bruksel.
Lajmin e publikoi Përfaqësuesi i Lartë i BE-së për politikë të jashtme, Josep Borrell.
“Kemi marrëveshje.
Kam kënaqësinë t’ju njoftoj se kryenegociatorët e Kosovës dhe të Serbisë, me lehtësimin e BE-së, kanë rënë dakord për masat, për të shmangur përshkallëzimin e mëtejshëm dhe për t’u përqendruar plotësisht në propozimin për normalizimin e marrëdhënieve mes tyre”, shkroi zoti Borrell.
Borrell bëri të ditur se kryenegociatorët e Kosovës dhe Serbisë, Besnik Bislimi dhe Petar Petkoviq, kanë rënë dakord për të hequr dorë secila nga veprime që kanë çuar në tensionimin e situatës në pjesën veriore të Kosovës dhe midis dy vendeve dhe për t’u përqendruar plotësisht në propozimin për normalizimin e marrëdhënieve midis tyre.
“Serbia do të ndalojë lëshimin e targave me emërtimet e qyteteve të Kosovës dhe Kosova do të ndërpresë veprimet e mëtejshme në lidhje me riregjistrimin e automjeteve”, shkroi Borrell.
Ai u bëri thirrje palëve që në ditët në vijim të diskutojnë për hapat e ardhshëm.
Njëkohësisht e vlerësoi punën e përfaqësuesit special të BE-së për dialogun dhe kryenegociatorët e dy shteteve.
“Falënderoj përfaqësuesin special Miroslav Lajçak dhe palët për punën e palodhur”, ka thënë Borrell.
We have a deal!
— Josep Borrell Fontelles (@JosepBorrellF) November 23, 2022
Very pleased to announce that Chief Negotiators of #Kosovo & #Serbia under EU-facilitation have agreed on measures to avoid further escalation and to fully concentrate on the proposal on normalisation of their relations.
Kryenegociatorët e Kosovës dhe Serbisë nuk janë prononcuar ende lidhur me marrëveshjen.
Takimi i tyre që rezultoi me marrëveshje u zhvillua vetëm dy ditë pas takimit të Kryeministrit të Kosovës, Albin Kurti, dhe Presidentit të Serbisë, Aleksandar Vuçiq, i cili nuk dha marrëveshje.
Ky takim u mbajt gjatë pezullimit 48 orësh të vendimit për gjobitjen e pronarëve të automjeteve me targa të lëshuara nga Serbia. Pezullimi u bë nga kryeministri Kurti, pas kërkesës së Shteteve të Bashkuara të Amerikës.
(r.m.)