Bled (Slloveni), 1 shtator 2021 – Përfaqësuesi i Bashkimit Evropian në dialogun Kosovë-Serbi, Mirosllav Lajçak, është takuar të mërkurën me kryeministrin e Kosovës, Albin Kurti, dhe me presidentin e Serbisë, Aleksandar Vuçiq, për hapat e ardhshëm në dialogun për normalizimin e marrëdhënieve midis Kosovës e Serbisë.
Takimet janë realizuar në margjina të Forumit Strategjik të Bledit, në Slloveni.
Lajçak i ka cilësuar këto takime si “të rëndësishme dhe substanciale”.
“Në margjina të Forumit Strategjik të Bledit 2021 i kam zhvilluar dy takime të ndara, të rëndësishme dhe substanciale me presidentin e Serbisë, Aleksandar Vuçiq, dhe me kryeministrin e Kosovës, Albin Kurti, për të diskutuar për hapat tjerë në javët e ardhshme në kuadrin e Dialogut për normalizimin e marrëdhënieve midis tyre”, ka shkruar Lajçak në Twitter.
In the margins of #BSF2021, I held two important & substantial separate meetings with the President of Serbia @predsednikrs @avucic and with the Prime Minister of Kosovo @albinkurti to discuss the next steps in the coming weeks in the Dialogue on normalization of their relations pic.twitter.com/SRonkkJxV0
— Miroslav Lajčák (@MiroslavLajcak) September 1, 2021
Ndërkaq, kryeministri Kurti ka njoftuar se në takim me Lajçakun është diskutuar edhe për perspektivën europiane për vendet e Ballkanit Perëndimor.
“Ne diskutuam për marrëdhëniet BE-Ballkan Perëndimor, si edhe për takimet e mëparshme dhe të ardhshme të dialogut me Miroslav Lajçakun në Forumin Strategjik të Bledit. Ne u pajtuam për rëndësinë e afrimit të perspektivës europiane për njerëzit dhe se procesi i zgjerimit të BE-së në gjashtë vendet e Ballkanit Perëndimor nuk ka alternativë”, ka shkruar Kurti në Twitter.
We discussed EU-Western Balkans relations as well as the previous and upcoming dialogue meetings with @MiroslavLajcak at #BSF. We agreed on the importance to bring EU-perspective closer to people and that there is no alternative to EU enlargement process for the WB6 region. pic.twitter.com/uQbR1HEv4F
— Albin Kurti (@albinkurti) September 1, 2021
Kështu, Kurti ka lënë të kuptohet se asnjë nismë, pra as “Open Balkan”, nuk mund të zëvendësojë procesin e integrimit të vendeve të Ballkanit Perëndimor në Bashkimin Evropian.
Kurti është kundërshtar më i madh i nismës “Open Balkan”, të presidentit të Serbisë, Aleksandar Vuçiq, kryeministrit të Shqipërisë, Edi Rama, dhe kryeministrit të Maqedonisë së Veriut, Zoran Zaev.
Edhe i dërguari special i Bashkimit Evropian për dialogun Kosovë-Serbi, Mirosllav Lajçak, ka shprehur rezerva ndaj nismës “Open Balkan”. Tri ditë më parë, në Forumin e Alpbachut në Vjenë, ai ka thënë se kjo është “një iniciativë e pashëndetshme që i bën konkurrencë proceseve të integrimit evropian”.
(r.m.)