Tiranë, 17 nëntor 2021 – Presidenti i Shqipërisë, Ilir Meta, deklaroi të martën në mbrëmje se kryetari i Partisë Demokratike, Lulzim Basha, nuk mund t’i iki përgjegjësive të tij e të shpikë gjithnjë fajtorë.
Meta ju kundërpërgjigj kështu akuzave të pak javëve më parë të zotit Basha, i cili, gjatë një ndërhyrjeje në parlament, foli për “Trekëndëshin e Bermudave” apo “Trekëndëshin e së keqes”, ku përfshiu ish kryeministrin Sali Berisha, kreun e shtetit Meta dhe kryeministrin Edi Rama.
“Është e drejta e tij të bëjë lapsuse, edhe të ketë ndoshta ndonjë mendim të tij, se është i lirë. Unë nuk kam asnjë shqetësim. Unë e kam respektuar gjithmonë dhe jam përpjekur ta ndihmoj që ai të mos gabojë rëndë.Sa herë më ka kërkuar ndihmë ja kam dhënë, sa herë i ka rënë telefonit tim e ka pasur të hapur”, tha zoti Meta duke shtuar më pas se “nuk është problemi i trekëndëshit që thotë zoti Basha. Problemi kryesor në këtë rast është katërkëndëshi i përgjegjësive madhore, të cilave ai nuk mund t’i ikë dhe nuk mund t’ua shkarkojë të tjerëve. Bojkoti i reformës administrative-territoriale, bojkoti i Reformës në Drejtësi, djegia e mandateve në Parlament dhe zerimi i opozitës nga pushteti lokal, janë 4 përgjegjësi madhore të cilave Lulzim Basha, nuk u ikën dot”, tha Meta, në një intervistë për TV ORA.
Zoti Meta u pyet dhe për përplasjen e fortë në gjirin e Partisë Demokratike, e cila shpërtheu pas vendimit të zotit Basha për të përjashtuar nga grupi parlamentar zotin Berisha, për shkak se ky i fundit është shpallur “non grata” nga Departamenti amerikan i shtetit. Kreu i shtetit tha se nuk dëshironte të hynte në çështjet e brendshme të Partisë Demokratike. Megjithatë, ai deklaroi se “është një fakt që, opozita ka një problem të rëndësishëm, legjitimitetin e lidershipit të saj. Eshtë një lidership që nuk mban përgjegjësi dhe gjithmonë do shpikë një fajtor”.
“Këshilla që i kam dhënë gjithmonë zotit Basha ka qenë ta respektojë gjithmonë zotin Berisha, por të vendosë vetë edhe kur mendon që zoti Berisha mund ta ketë gabim. Por asnjëherë të mos bjerë viktimë e diversioneve për të injoruar kontributet e tij apo vlerat e tij, sepse, në fund të fundit, dihen këto vlera”, theksoi ai.
Zoti Meta ishte njeriu që reagoi me tone më të ashpra edhe se vetë zoti Berisha kur u njoftua vendimi i autoriteteve amerikane që ish-kryeministrit shqiptar tëshpallet”persona non grata”.
Në një sulm të hapur ndaj Departamentit Amerikan të Shtetit, Meta e ka cilësuar vendimin si “fletërrufe” të porositur në Tiranë apo “akt të poshtër”.
(r.m.)