Beograd, 1 janar 2024 – Sot, më 1 janar, nisi lëvizja e lirë e automjeteve me targa RKS (Republika e Kosovës) në territorin e Serbisë.
Lëvizja e tyre është mundësuar pas vendimit të marrë nga Qeveria e Serbisë më 25 dhjetor të vitit 2023.
Shefi i Zyrës për Kosovën në Qeverinë serbe, Petar Petkoviq, tha se Qeveria e Serbisë e ka marrë këtë vendim “për të ndihmuar serbët nga Kosova”. Ai kishte deklaruar se vendimi “është një shtysë shtesë për nismën ‘Ballkani i Hapur’ që, sipas tij, ua lehtëson jetën serbëve në Kosovë.
Vendimi i Qeverisë së SerbiSë për të njohur targaT RKS u mor pasi serbët që jetojnë në komunat në pjesën veriore të Kosovës, gjerësisht zëvendësuan me RKS targat KS të lëshuara nga UNMIK-u, por edhe targat e lëshuara nga autoritetet e Serbisë që ishin me akronime serbe për qytetet e Kosovës.
Petkoviq tha se nuk është sekret që 99 për qind e serbëve në Kosovë tashmë i kanë regjistruar automjetet e tyre me targa RKS, sepse, siç ishte shprehur, kjo është mënyra e vetme për të lëvizur nëpër Kosovë.
“Ato po ashtu përdoren nga klerikët e Dioqezës Rashkë-Prizren për të arritur deri te faltoret dhe besimtarët”, tha Petkoviq, duke shtuar se me këtë vendim, Qeveria serbe “nuk hoqi dorë nga vendimi për të mos e njohur pavarësinë e Kosovës”.
Një ditë më parë, Presidenti i Serbisë, Aleksandar Vuçiq, deklaroi se vendimi për lëvizjen e lirë të automjeteve me targa RKS nëpër Serbi “ka shmangur gracka dhe rreziqe të mëdha” për shtetin e tij.
Sipas Vuçiqit, nga ky vendim “do të përfitojë populli serb dhe Serbia në tërësi”.
Sipas të dhënave të Qeverisë së Kosovës nga 1 nëntori deri më 14 dhjetor i vitit 2023, 3.405 qytetarë kanë konvertuar targat serbe në ato RKS, kryesisht në Mitrovicë të Veriut dhe Leposaviq.
Për çështjen e lëvizjes së Lirë, Kosova dhe Serbia kishin arritur marrëveshje më 2011, në kuadër të dialogut për normalizimin e raporteve që ndërmjetësohet nga blloku evropian.
Makinat ishin lejuar të kalonin, ndërkaq targat ishin mbuluar me letra ngjitëse.
Para praktikës së letrave ngjitëse, automjetet me targa RKS detyroheshin të merrnin targa provuese në kufirin me Serbinë, që vlenin 60 ditë dhe kushtonin 5 euro. Por, më 20 shtator të vitit 2021, Qeveria e Kosovës vendosi masën e reciprocitetit, që detyroi edhe shoferët nga Serbia ta kalonin të njëjtën procedurë për të hyrë në Kosovë.
Por, kjo masë nxiti pakënaqësi në mesin e popullatës serbe në Kosovë, të cilët bllokuan rrugët që çonin në pikëkalimet kufitare me Serbinë, në Jarinjë dhe Bërnjak.
Për të ulur tensionet, me ndërmjetësimin e bllokut, më 30 shtator 2021, u arrit marrëveshja e përkohshme për targat. Kjo marrëveshje, që kishte për qëllim të ishte në fuqi për gjashtë muaj derisa grupet punuese të Kosovës dhe Serbisë të gjenin një zgjidhje afatgjate, bëri që shoferët me targa të Kosovës dhe me ato të Serbisë, të vendosnin letra ngjitëse në simbolet shtetërore në targa, sa herë që kalonin kufirin e këtyre dy shteteve.
(r.m.)