Prishtinë, 18 prill 2025 – Presidentja e Kosovës, Vjosa Osmani, u ka ndarë të premten medalje presidenciale, “Nderi i Republikës”, tre të mbijetuarve të dhunës seksuale gjatë luftës së fundit në Kosovë.
Në një ceremoni të premten në Presidencë, Osmani u ndau medalje Vasfije Krasniqit, Shyrete Tahirit dhe Ramadan Nishorit, të cilët janë viktimat e vetme që kanë rrëfyer publikisht se janë dhunuar seksualisht nga forcat serbe gjatë luftës së viteve 1998-99.
Sipas deklaratave publike të zyrtarëve të institucioneve të Kosovës, gjatë luftës së fundit kanë ndodhur rreth 20 mijë raste të dhunës seksuale.
Osmani tha se Krasniqi, Tahiri dhe Nishori janë zëri i së vërtetës që po pret drejtësi me dekada.
“Ka momentet kur fjalët nuk mjaftojnë për ta shprehur mirënjohjen, siç ka edhe njerëz që me guximin e tyre të lënë pa fjalë. Sot, përulemi me respektin me të thellë përballë tre individëve që janë më shumë sesa thjesht individë. Vasfije Krasniqi, Shyrete Tahiri dhe Ramadan Nishori do të mbetet sot e përgjithmonë emra të gdhendur në ndërgjegjen kolektive të popullit tonë”, tha Osmani gjatë ceremonisë
Vasfije Krasniqi, e cila ishte gruaja e parë që foli haptazi për përjetimet e saj vite më parë, u bëri thirrje viktimave të dhunës seksuale gjatë luftës të mos heshtin.
“Të dashura viktima, ju lus që kudo që jeni, ka ardhur koha për të kërkuar drejtësi. Mos të fshihemi prapa asaj që ka ndodhur, mos t’ia falim Serbisë krimet që i ka bërë. Faleminderit familjes që më ka mbështet dhe nuk më ka paragjykuar”, tha Krasniqi pasi e pranoi medaljen.
Shyrete Tahiri, e cila u bë gruaja e dytë në Kosovë, pas Krasniqit, që ka folur publikisht për përjetimet e dhunës seksuale në luftë, tha se ndihet mirënjohëse ndaj njerëzve për kurajën që ia ofrojnë.
“Dua ta falënderoj presidenten tonë, e cila na mbështet gjithmonë, sidomos në drejtësi. Kur kemi drejtësi, kemi paqe”, tha ajo.
Ramadan Nishori është viktima më i fundit dhe burri i parë që e pranon publikisht se është dhunuar seksualisht nga forcat serbe gjatë luftës së fundit në Kosovë.
“Unë desha vetëm dy fjalë. E përshëndes gjithë popullin tonë që më ka përkrahur shumë: faleminderit shumë”, tha Nishori të premten.
Numri i saktë i personave të dhunuar gjatë luftës së fundit në Kosovë më 1998-99, nuk dihet.
Por, sipas një raporti të Qendrës Amerikane për Kontrollimin dhe Parandalimin e Sëmundjeve, kjo shifër arrin deri në 20.000.
Megjithatë, statusin ligjor si të mbijetuar të dhunës seksuale gjatë luftës e kanë marrë vetëm afër 2.000 persona.