Tiranë, 9 qershor 2021 – Parlamenti i Shqipërisë po diskuton për raportin e Komisionit Hetimor, të ngritur nga shumica socialiste që kërkon shkarkimin nga detyra të Presidentit të Republikës, Ilir Meta.
Komisioni i ka propozuar parlamentit shkarkimin e zotit Meta, për shkak të “shkeljeve të rënda të Kushtetutës” që thuhet se i ka bërë ai, me qëndrimet dhe deklaratat e tij para dhe gjatë fushatës elektorale të zgjedhjeve parlamentare të 25 prillit.
Sipas Komisionit hetimor, Kreu i Shtetit rezulton të ketë kryer së paku 9 shkelje, duke nisur që nga betimi i tij si president, te cënimi i procesit zgjedhor, i marrëdhënieve me partnerët strategjikë të Shqipërisë, imazhit dhe reputacionit të vendit, cënimi i figurës së vetë institucionit të Presidentit apo dhe abuzim me kompetencat kushtetuese të Presidentit.
Të gjithë këto shkelje velrësohen nga komisioni si “shkelje të rënda të Kushtetutës, pasi nga aktet e administruara në këtë proces hetimor dhe siç arsyetohet në këtë raport vërtetohet se: i) për kryerjen e akteve që përbëjnë shkelje të Kushtetutës Presidenti nuk ka pasur ndonjë qëllim të justifikuar; ii) me këto shkelje Presidenti ka cënuar të drejtat e njeriut, marrëdhëniet shoqërore, politike sensitive dhe të rëndësishme që mbrohen nga Kushtetuta, Kodi Penal dhe legjislacioni shqiptar në fuqi; iii) Presidenti ka kryer shkeljet kushtetuese në mënyrë të përsëritur dhe aktet që përbëjnë shkelje kanë qenë konsistente; iv) shkeljet kushtetuese të konsumuara nga Presidenti kanë pasur ndikim negativ në funksionimin e shtetit dhe në sferën sociale, politike dhe në ekonominë e vendit; v. sjellja e Presidentit ndaj shkeljeve kushtetuese është në kundërshtim të hapur me përgjegjshmërinë, vetëpërmbajtjen, seriozitetin, maturinë dhe korrektësinë e qëndrimeve që duhet të shfaqë një përfaqësues i lartë i shtetit, që respekton parimet e shtetit të së drejtës dhe sundimit të ligjit, të cilit Kushtetuta i ka veshur atributet e përfaqësuesit të unitetit të popullit”.
Presidenti Meta nga ana e tij ka folur gjatë gjithë kohës për një “nismë ilegjitime të parlamentit”.
Ai nuk i është përgjigjur thirrjes së komisionit për të paraqitur pikëpamjet e tij lidhur me akuzat e socialistëve. Ai nuk e shfrytëzoi as të drejtën që të marrë pjesë në seancën e sotme.
Si për të dëshmuar indiferencën e tij ndaj vedimmarrjes së sotme në parlament, gjat kohës që aty po diskutohej për raportin e komisionit hetimor, Meta organizoi në presidencë një aktivitet kulturor me këngë e valle të Ansamblit Folklorik i Dibrës “Hazis Ndreu”.
Pavarësisht vendimit të sotëm të parlamentit, i cili duhet të merret me dy të tretat e anëtarëve të tij, fjalën e fundit do të duhet ta thotë Gjykata Kushtetuese.
(r.m.)