Presidenti i “Morgan Stanley International” – mes të zhdukurve pas mbytjes së jahtit në Itali
Romë, 20 gusht 2024 – Gjatë kërkimeve dy ditore për jahtin luksoz me vela “Bayesian” që u mbyt në zonën e Palermos, nuk është gjetur asnjë gjurmë e gjashtë personave që rezultojnë të zhdukur.
Ka dyshime se trupat e tyre mund të jenë bllokuar në rrënojat e jahtit.
Të hënë, në mbrëmje vonë, zhytësit arritën të hynin në jaht, por nuk arritën të hyjnë në të gjitha ambientet, për shkak se hapësira ishte bllokuar nga orenditë e përplasura.
Sipas raportimeve të fundit, mes të zhdukurve janë edhe presidenti i Bankës së famshme amerikane të investimeve Morgan Stanley International, Jonathan Bloomer, dhe bashkëshortja e tij. Thuhet se Bloomer është mik i ngushtë me pronarin e hajtit, Mike Lynch, edhe ai i zhdukur.
Kuzhinieri i jahtit u gjet i vdekur në det, ndërsa 15 personat tjerë që gjendeshin në jahtin e mbytur janë shpëtuar.
Kush janë të zhdukurit?
Të zhdukurit nga tragjedia e ndodhur në detin e Palermos janë figura shumë të spikatura në botën e biznesit. Shumë shpejt u bë e ditur se Mike Lynch, një manjat britanik i teknologjisë, ishte në bordin e anijes me vela. Ai gjithashtu ia detyron pasurinë e tij kompanisë së softuerit Autonomy që bashkëthemeloi në Kembrixh në vitin 1996. Autonomy iu shit gjigantit të IT Hewlett-Packard në 2011 për 11 miliardë dollarë. Një marrëveshje e cila megjithatë i kushtoi Lynch-it një betejë të gjatë ligjore, i akuzuar për mashtrim në lidhje me shitjen tek HP. Lynch madje u ekstradua në Shtetet e Bashkuara në 2022 për t’u përballur me gjyqin që kulmoi qershorin e kaluar me lirimin e tij.
Jonathan Bloomer është president i bankës së famshme amerikane të investimeve Morgan Stanley International. Bloomer është mik i ngushtë me Mike Lynch. Ai kishte qenë një nga dëshmitarët e mbrojtjes në gjyqin e Lynch. Duket se festa që përfundoi me tragjedi në Siçili ishte një mundësi për të festuar suksesin në gjykatë. Të tjerët të zhdukur janë gruaja e Bloomer, vajza 18-vjeçare e Lynch, Hannah, avokati Chris Morvillo dhe gruaja e tij Nada Morvillo.
Anija me vela Bayesian ishte një xhevahir teknologjik 56 metra, por u përfshi nga një tornado që goditi zonën Santa Flavia, në provincën e Palermos, në agim të 19 gushtit. Tani është zhytur rreth 50 metra thellë. 12 pasagjerët dhe 10 anëtarët e ekuipazhit përfunduan në ujë. 15 persona u shpëtuan, ndërsa kuzhinieri i anijes – Ricardo Thomas – u gjet i pajetë.
Ndër personat që mbijetuan ishte edhe gruaja e Lynch, Angela Bacares. Me të edhe Charlotte Golunski, 35 vjeç. Ajo arriti të shpëtojë vajzën e saj njëvjeçare. Të dy janë mirë ashtu si edhe babai i fëmijës James Emsilie, 35 vjeç. Sipas fjalëve të gruas, e gjithë drama e përjetuar në pak çaste.
“Për dy sekonda e humba në ujë vajzën e vogël, pastaj menjëherë e përqafova sërish mes tërbimit të dallgëve. E mbajta fort, pranë vetes, ndërsa deti ishte në furtunë. Për fat të mirë, 11 prej nesh arritëm të hipnim në të”, tha ajo.
Sipas disa dëshmive, era do të kishte thyer direkun e jahtit (75 metra prej alumini, më i larti në botë), kjo do të bënte që anija të anonte dhe do të ishte mbushur shpejt me ujë. Jo shumë larg ndodhej anija me vela holandeze “Sir Robert Baden Powell” dhe ka qenë ekuipazhi i kësaj anijeje që ka ndërhyrë i pari për të ndihmuar personat që kanë përfunduar në ujë.
Karsten Börner, komandanti i anijes holandeze, tregon ato momente dramatike: “Ne po planifikonim të shkonim në portin Arenella në Palermo, por na goditi një stuhi dhe u përpoqëm të qëndronim me motorët të ndezur. Pastaj kuptuam se varka pranë nesh nuk ishte më aty. Ne pamë një flakë të kuqe që vinte nga zona e varkës, kështu që unë dhe oficeri im i parë hipëm në tender dhe shkuam për të ndihmuar: ne gjetëm të mbijetuarit, duke përfshirë një vajzë të vogël. Alarmi u ngrit, mbërritën edhe njësitë e rojes bregdetare”.
Prokuroria e Termini Imerese ka hapur një hetim. Do të jetë e nevojshme të kuptohet se si ishte e mundur që anija të mbytet në pak çaste, ndërkohë që mjetet lundruese të tjera, qoftë edhe ato aty pranë, nuk pësuan asnjë dëmtim.