Presidenti Ilir Meta në Prishtinë: Kosova, gjaku që nuk falet kurrë!

Presidenti i Republikës, Ilir Meta në një bashkëbisedim të zhvilluar me pedagogë e studentë në Prishtinë me temën “Shqiptarët, faktor stabiliteti në Ballkan”, theksoi se Shqipëria dhe Kosova ndajnë shumë e më shumë se interesa të përbashkëta strategjike.

Meta theksoi se marrëdhëniet ndërmjet Shqipërisë dhe Kosovës nuk janë kundër asnjë rajoni tjetër.

“Kosova gjaku që nuk falet kurrë. Një eksod i heshtur që po ndodh mes shqiptarësh në rajon mbetet shqetësimi im i madh. Dua të theksoj rëndësinë e ndërgjegjësimit nga të gjithë ne drejtuesit por edhe elitat intelektuale për ti inkurajuar të rinjtë për të qëndruar në Kosovë, Shqipëri në trojet tona, për të ndaluar shpopullimin e heshtur. Si ju në Kosovë dhe ne në Shqipëri dhe të gjithë shqiptarët duhet të përpiqen që aty ku jetojnë të mbizotërojë ligji. Zgjedhjet në Kosovë kanë qenë një mësim dhe tregojnë se kjo shoqëri është vigjilente dhe kërkuese. Këto tipare e vlerësojnë shtetin e  Kosovës. Kam përshëndetur vendosjen e traditës së bashkëpunimit. Jemi të vetëdijshëm se Shqipëria dhe Kosova ndajmë shumë më shumë se interesa të përbashkëta strategjike. Marrëdhëniet ndërmjet Shqipërisë dhe Kosovës nuk janë kundër asnjë rajoni tjetër”, tha Meta.

I ndalur tek ‘Open Balkan’, presidenti tha se aksionet e caktuara politike si edhe frymëzimi i kriminelëve të luftës dhe mohimi i gjenocidit nuk mund të bashkëjetojnë me aspiratat europiane.

“Deklaratat dhe aksionet e caktuara politike, frymëzimi i kriminelëve të luftës dhe mohimi i gjenocidit nuk mund të bashkëjetojnë me aspiratat europiane. Arkitektura e paqes dhe sigurisë që NATO dhe BE kanë projektuar është garancia më e mirë. Shqipëria duhet të përmbushë angazhimet e saj si vend anëtar i NATO-s, Kosova duhet të punojë pa u lodhur për anëtarësimin në NATO dhe rrugën drejt BE-së. Po konstatojmë halucinacione të padobishme si në drejtim të marrëdhënieve me Kosovën dhe BE  e kam fjalën për të ashtë-quajturin “Open Balkan”. Është me rëndësi që të kemi në konsideratë parimet që garantojnë një bashkëpunim të qëndrueshëm dhe afatgjata.  Si mund ti besojmë qëllimeve të mira kur ringjallet fantazma e Millosheviçit”, tha më tej Presidenti Meta.

(BalkanWeb)