Moskë, 10 qershor 2022 – Presidenti rus Vladimir Putin e krahasoi veten e tij me me Carin kurse agresionin ndaj Ukrainës me pushtimet e Carit rus në shekullin e 18-të.
Në komentet e publikuara në televizionet ruse me rastin e 350-vjetorit të lindjes së Pjetrit të Madh, Putin tërhoqi paralele midis atyre që ai i përshkroi si “dy sipërmarrjet historike binjake” për të rimarrë tokat ruse.
Pasi e vizitoi një ekspozitë kushtuar Carit në Moskë, Putin foli për nevojën e vendit të tij “për të marrë përsëri” territorin dhe “për të mbrojtur veten”. Ai tërhoqi paralele midis themelimit të Shën Petersburgut nga Pjetri i Madh në vitin 1703 dhe ambicieve të Rusisë moderne.
Kur Pjetri e themeloi kryeqytetin e ri “asnjë vend evropian nuk e njohu atë si Rusi. Të gjithë e njohën atë si Suedi”, tha Putin.
“Çfarë po bënte (Pjetri)? Morri mbrapsht dhe përforcoi. Kjo është ajo që ai bëri. Dhe me sa duket edhe ne gjithashtu kemi detyrën të marrim mbrapsht dhe të përforcohemi”, shtoi ai.
Në komentet televizive në ditën e 106-të të luftës së tij në Ukrainë, Putin shtoi: “Nëse shkojmë nga fakti se këto vlera themelore përbëjnë bazën e ekzistencës sonë, sigurisht që do të kemi sukses në zgjidhjen e detyrave me të cilat përballemi”.
Putin gjithashtu duket se mbështet zgjerimin e mëtejshëm territorial të Rusisë, duke thënë se është “e pamundur të ndërtohet një gardh rreth një vendi si Rusia. Dhe ne nuk kemi ndërmend ta ndërtojmë atë gardh”.
Një këshilltar i lartë i presidentit ukrainas Volodymyr Zelenskiy hodhi poshtë komentet dhe atë që ai e quajti çdo përpjekje për të legalizuar vjedhjen e tokës.
“Perëndimi duhet të tërheqë një vijë të qartë të kuqe në mënyrë që Kremlini të kuptojë çmimin e çdo hapi të ardhshëm të përgjakshëm… Ne do të çlirojmë territoret tona,” tha Mykhailo Podolyak.
Putini ka kërkuar të justifikojë pushtimin rus të Ukrainës duke pohuar se Ukraina nuk ka identitet të vërtetë kombëtar ose traditë të shtetësisë, ndërsa Moska thotë se ka vepruar për të çarmatosur dhe “denazifikuar” Ukrainën.
Në korrik 2021, Kremlini botoi një ese të gjatë nga Putin, në të cilën ai argumentonte se Rusia dhe Ukraina ishin një komb, i ndarë artificialisht.
(REL)