Prishtinë, 23 korrik 2022 – Qeveria e Kosovës mirëpret çfarëdo diskutimi ne raport rezolutën që ka miratuar Kuvendi i Shqipërisë për raportin e Dick Martyt, tha ministrja e Drejtësisë, Albulena Haxhiu, dhe shtoi se nuk e di nëse rezoluta do të ketë apo nuk do të ketë ndikim “për shkak që se është herët të flitet për këtë”.
Kuvendi i Shqipërisë ka votuar unanimisht, me 125 vota të deputetëve, rezolutën me të cilën synon të hedhë poshtë akuzat për trafikimin me organe të qenieve njerëzore gjatë luftës në Kosovë, pretendime që burojnë nga një raport i Këshillit të Evropës.
Në konferencën për media të 23 korrikut, ajo tha se është e rëndësishme që të drejtat e qytetarëve të Kosovës që po mbahen në Hagë të respektohen.
“Arsyeja që po e them këtë është që kemi pasur shqetësime se të drejtat e tyre po shkelen”.
“Sa i përket mekanizimit mbikëqyrës, pas vizitës që ka pasur Kryetari i Kuvendit [Glauk Konjufca], pas vizitës që kam pasur unë, tani kjo çështje është në kuadër të diskutimeve institucionale dhe ende nuk mund të them se cila është zgjidhja për këtë, por ju garantoj që jemi ne diskutime me institucionet e Kosovës për ta adresuar këtë çështje”, tha ajo.
Por, Haxhiu tha se Gjykatën Speciale e kanë gjetur si fakt të kryer dhe se Qeveria aktuale nuk mund të mbahet përgjegjëse.
“Mund të mbahen [përgjegjës] vetëm ata që në atë kohë ua kishin ndrydhur duart deputetëve të Kuvendit të Kosovës dhe fatkeqësisht janë pikërisht ata që sot hedhin akuza në drejtim te Qeverisë sonë”, tha ajo.
E pyetur se a kanë dallime sa i përket Speciales me Presidencën, ajo tha se “ju lë juve të gjeni dallimet nëse ka të tilla”, duke shtuar e secili institucion i di përgjegjësitë që ka.
Duke folur për ministrinë që e drejton, Haxhiu tha se prioritet i saj mbetet lufta kundër krimit të organizuar dhe korrupsionit, dhe se muaji korrik shënoi miratimin e tetë nismave të rëndësishme ligjore në Qeveri dhe në Kuvend.
Nder to u përmend edhe Byroja Shtetërore për Verifikimin dhe Konfiskimin e Pasurisë së Pajustifikueshme.
Në mandatin e kësaj Byroje, të gjithë zyrtarët publikë në Kosovë mund të jenë subjekt i verifikimit të pasurisë nëse ekzistojnë dyshime se ajo është fituar në mënyrë të kundërligjshme. Përveç tyre, verifikimi dhe konfiskimi i pasurisë së pajustifikueshme do bëhet edhe për anëtarët e familjes së tyre dhe palëve të treta, që nënkupton personat te të cilët dyshohet se është bartur pasuria e zyrtarëve publikë.
Ajo tha se secili prej rekomandimeve të Komisionit të Venecias në raport me këtë projektligj do të adresohet dhe të shndërrohet në amendament.
“Rrjedhimisht ne do të jemi pranë grupit punues për legjislacion në mënyrë që ti ndihmojmë ata për këtë çështje, sepse ne kemi interes që një projektligj që miratohet në Kuvendin e Kosovës të jetë në linjë me standardet evropiane, praktikat më të mira, por edhe të respektoj të drejtat e njeriut”.
Në konferenën e 18 qershorit, Haxhiu tha se në konstatimet e Komisionit të Venecias rekomandohet ndërmarrja e veprimeve për ndryshimet e nevojshme ligjore dhe kushtetuese, në mënyrë që të arrihet rezultati i synuar për një gjyqësor me integritet profesional dhe efikas.
“Komisioni rekomandon fillimisht verifikimin e niveleve të larta në gjyqësor dhe në prokurori, përmes një mekanizimi të jashtëm, pra nivele të larta duke filluar nga Këshilli Gjyqësor i Kosovës, Këshilli Prokurorial i Kosovës, si dhe kryetarëve të të gjitha gjykatave dhe kryeprokurorëve të të gjitha prokurorive”.
Kur u pyet për votën abstenuese të kryetarit të Kuvendit, Glauk Konjufca në votimin e projektligjit për Byronë, Haxhiu tha se ai e ka sqaruar këtë “derisa Komisioni për Legjislacion të përfshijë rekomandimet e Komisionit të Venecias do ta mbajë atë qëndrim”, duke shtuar se Konjufca nuk e kundërshton këtë projektligj.
(REL)