Bruksel, 2 prill 2025 – Sekretari i përgjithshëm i NATO-s, Mark Rutte, në prag të takimit dyditor të ministrave të Jashtëm të NATO-s, në Bruksel, e ka theksuar se për aleancën është shumë e rëndësishme që situata e sigurisë në Kosovë të mbetet stabile.
“Ne e përcjellim nga afër situatën e sigurisë në Kosovë. Duhet të sigurohemi që stabiliteti i arritur atje nga viti 1999 të vazhdojë të jetë i qëndrueshëm”, ka thënë ai.
Sekretari Rutte ka folur edhe për sulmin e armatosur të serbëve në Banjskë, në pjesën veriore të Kosovës, si edhe për sulmin ndaj trupave të KFOR-it në Zveçan. Ai ka thënë se Serbia duhet të punojë që përgjegjësit për këto sulme të japin përgjegjësi. Ai ka thënë se për këtë ka folur edhe me Presidentin e Serbisë, Aleksdandar Vuçiq.
“Sa u përket ngjarjeve në Banjskë dhe sulmit ndaj forcave të NATO-s në vitin 2023, serbët duhet të punojnë për të mbajtur përgjegjësi. Për këtë kemi folur me Vuçiqin në telefon, por edhe kur kemi drekuar bashkë në Bruksel, dy javë më parë”, ka thënë ai.
Rutte është pyetur nëse NATO-ja është konsultuar paraprakisht për marrëveshjen e bashkëpunimit në fushën e mbrojtjes mes Serbisë dhe Hungarisë, të nënshkruar më 1 prill. Ai ka thënë se aleanca nuk është konsultuar për këtë marrëveshje.
Por, ai e ka përmendur edhe marrëveshjen e bashkëpunimit në fushën e mbriojtjes mes Kosovës, Shqipërisë dhe Kroacisë. Ai ka thënë se shtetet kanë të drejtë të bashkëpunojnë midis tyre në interest ë ruajtjes së paqes dhe sigurisë.
Sekretari i përgjithshëm i NATO-s, Mark Rutte, ka vizituar pak kohë më parë Kosovën dhe Bosnjën e Hercegovinën. Zyrtarë të NATO-s i kanë kualifikuar këto vizita si dëshmi të prekshme se Ballkani Perëndimor mbetet lart në agjendën e Aleancës Veriatlantike. Një zyrtar i NATO-s që ka folur për gazetarë para konferencës së Ruttes, e ka vlerësuar situatën e sigurisë në Ballkanin Perëndimor si jetike për Aleancën dhe ka theksuar se Aleanca nuk do të lejojë që ajo të rrezikohet.
(r.m.)