Podgoricë, 26 shtator 2023 – Raportuesja e posaçme e Kombeve të Bashkuara për pavarësinë e gjyqtarëve dhe të avokatëve, Margaret Satterthwaite, tha se tuneli të gërmuar në depon e Gjykatës së Lartë në Podgoricë është “një paraqitje simbolike e gjendjes së gjyqësorit” në Malin e Zi.
“Kjo flet për mungesën e sigurisë, për infrastrukturën jashtëzakonisht të papërshtatshme dhe për rrezikun e madh të ndërhyrjes së faktorëve të jashtëm në punën e gjyqësorit”, tha ajo të martën, në Podgoricë.
Zonja Satterthwaite tha se reagimet për këtë ngjarje konfirmojnë tendencën e aktorëve politikë për të komentuar publikisht punën e gjyqtarëve dhe të prokurorëve dhe psërpjekjen e ture për të marrë meritat për punën e prokurorisë.
“Mendoj se trajtimi i këtij rasti tregoi për një politizim. Autoritetet gjyqësore duhet të lejohen të bëjnë punën e tyre që hetimi të kryhet në mënyrë të drejtë dhe të plotë dhe autoritetet gjyqësore t’i lënë të arrijnë në përfundimet e tyre”, tha ajo, citon Zëri i Amerikës.
Margaret Satterthwaite tha se Mali i Zi ka nisur një reformë të gjerë të sistemit gjyqësor, ku me kushtetutë garantohen pavarësia e gjyqësorit dhe ndarja e pushteteve. Ajo tha se në disa raste Parlamenti i Malit të Zi ka dështuar të zgjedhë gjyqtarin e shtatë të Gjykatës Kushtetuese, kryeprokurorin e shtetit dhe anëtarët e Këshillit Gjyqësor.
“Deputetët në parlament duhet të vënë interesin e vendit të tyre para interesave politike dhe të sigurojnë që ata të emërohen në ato pozita pa vonesë”, tha zonja Satterthwaite.
Më 11 shtator, Policia në Mal të Zi e zbuloi një tunel nëntokësor që e lidhte një apartament me depon e Gjykatës së Lartë në Podgoricë, ku ruheshin lëndë narkotike dhe dëshmi e prova të tjera të veprave krimminale. Dhjetë ditë më vonë autoritetet policore i identifikuan personat që dyshohet se e kanë hapur tunelit dhe për të dyshuarit lëshuan fletarreste ndërkombëtare. Të dyshuarit për këtë vepër të rëndë penale janë shtetas të Serbisë.
(r.m.)