Prishtinë, 27 janar 2022 – Shtetet e Bashkuara, përmes Agjencisë së Shteteve të Bashkuara për Zhvillim Ndërkombëtar (USAID), ia kanë ndarë Kosovës 3 milionë dollarë shtesë ndihmë urgjente për luftimin e COVID-19.
Në një komunikatë të USAID-it thuhet se kjo ndihmë është dedikuar për forcimin e mbrojtjes së fëmijëve të cenueshëm që janë goditur nga pandemia dhe për të siguruar vazhdimësinë e ofrimit të shërbimeve sociale themelore.
Kjo ndihmë synon të ndihmojë përmirësimin e shërbimeve në systemin e kujdesit shëndetësor parësor, promovimin e vaksinimin dhe digjitalizimin e bazës së të dhënave të rasteve me COVID-19 për të lwhtësuar shkëmbimin e shpejtë të informatave në mes institucioneve shëndetësore.
“Shtetet e Bashkuara janë të përkushtuara ndaj partneritetit me Kosovën për t’i dhënë fund pandemisë COVID-19 dhe janë veçanërisht të fokusuara në zvogëlimin e ndikimeve të saj në popullatat e margjinalizuara. Luftimi i një pandemie globale kërkon përkushtimin e secilit prej nesh – prandaj, bëni pjesën tuaj të punës, lani duart, mbani maskë dhe vaksinohuni”, ka thënë Zeinah Salahi, drejtoreshë e Misionit të USAID-it në Kosovë.
Ndihma financiare prej 3 milion dollarësh amerikanë i është shtuar aktivitetit Reagimi ndaj Pandemisë, i cili zbatohet përmes UNICEF-it dhe ndërton mbi ndihmën paraprake në vlerë prej 5.1 milion dollarësh amerikanë për COVID-19 që USAID-i zotoi për Kosovën gjatë pandemisë. Që kur Kosova konfirmoi rastin e saj të parë me COVID-19, USAID-i ka punuar me punonjësit e kujdesit shëndetësor të vijës së parë dhe komunitetet për të ngadalësuar përhapjen, për t’u kujdesur për të prekurit dhe siguruar pajisjet e nevojshme për të luftuar COVID-19.
Vitin e kaluar, USAID-i shpërndau 249 komplete higjienike në qendrat shëndetësore, 7,750 komplete higjienike për familjet dhe 2,400 pako higjienike për nënat dhe foshnjat në të gjitha 38 komunat e Kosovës. Me fillimin e vitit shkollor, USAID-i gjithashtu u dhuroi komplete higjienike 660 shkollave fillore dhe të mesme.
Aktiviteti Reagimi ndaj Pandemisë gjithashtu punon në avancimin e komunikimit dhe informimit publik lidhur me fushatat e parandalimit dhe vaksinimit kundër COVID-19 në vend, forcimin e sistemit të zinxhirit të ftohtë të vaksinave dhe funksionalizimin e qendrave të përkohshme të vaksinimit.
Shtetet e Bashkuara mbeten donatori më i madh bilateral i sistemit shëndetësor të Kosovës në forcimin e reagimit ndaj COVID-19. Në fillim të pandemisë, Shtetet e Bashkuara siguruan 50 respiratorë fare të rinj dhe të papërdorur si pjesë e një pakoje mbështetëse që përfshinte pajisje shoqëruese të respiratorëve, instalimin, garancitë, planet e servisimit dhe uebinare online.
Shtetet e Bashkuara gjithashtu sollën pajisje laboratorike të testimit dhe skanerë termik për vendosje në terminalet hyrëse të vendkalimeve kufitare të Kosovës, përfshirë aeroportin e Prishtinës dhe katër vendkalime kufitare tokësore. Rishtazi, USAID-i lehtësoi, në emër të Qeverisë së SHBA-së, shpërndarjen e 538,200 dozave të vaksinës Pfizer.
(r.m.)