Podgoricë, 7 qershor 2023 – Sekretari i përgjithshëm i NATO-s, Jens Stoltenberg, në një intervistë për gazetën malaziase “Pobjeda” ka folur për situatën në veri të Kosovës.
Stoltenberg i ka dënuar sulmet ndaj ushtarëve të KFOR-it në Zveçan. më 29 maj, duke theksuar se sulmet e tilla janë të papranueshme
“NATO dënon fuqishëm sulmet e fundit të paprovokuara ndaj trupave të KFOR-it në veri, në të cilat u lënduan afro 40 paqeruajtës. Sulme të tilla janë të papranueshme dhe duhet të ndalen’, ka thënë ai.
Stoltember ka treguar se NATO ka dërguar në Kosovë edhe rreth 500 ushtarë të tjerë dhe ka vënë në gatishmëri një batalion shtesë.
“Kemi dërguar në Kosovë edhe rreth 500 ushtarë tjerë nga rezerva operative për Ballkanin Perëndimor dhe kemi vënë në gatishmëri një batalion shtesë, që edhe ata të dislokohen, sipas nevojës. Këto janë masa që të sigurohemi se KFOR-i ka forcën dhe aftësinë që i duhet për të përmbushur mandatin e tij”, ka thënë ai.
Stoltenberg ka thënë se misioni i NATO-s në Kosovë, KFOR, do t’i ndërmarrë të gjitha veprimet e nevojshme për t’u përkujdesur për një mjedis të sigurtë dhe për lirinë e lëvizjes për të gjithë njerëzit në Kosovë.
“Ne do të vazhdojmë të veprojmë në mënyrë të paanshme, në përputhje me mandatin tonë të Kombeve të Bashkuara, bazuar në Rezolutën 1244 të Këshillit të Sigurimit të OKB-së të vitit 1999”, ka thënë ai.
Stoltenberg ka thënë se Kosova dhe Serbia duhet të ndërmarrin urgjentisht hapat për uljen e tensioneve.
“Dhuna po e kthen prapa Kosovën dhe gjithë rajonin, duke vënë në pikëpyetje aspiratat euroatlantike. Si Prishtina ashtu edhe Beogradi duhet të ndërmarrin hapa konkretë për të shtensionuar situatën, të përmbahen nga sjelljet e mëtejshme të papërgjegjshme dhe të angazhohen në dialogun e ndihmuar nga BE-ja, që është rruga e vetme për paqe të qëndrueshme. NATO do të vazhdojë të luajë rolin e saj për të mbështetur sigurinë e qëndrueshme në Kosovë dhe stabilitetin e gjithë Ballkanit Perëndimor”, ka thënë skretari i përgjithshëm i NATO-s, Jens Stoltenberg.
Në Kosovë këtë javë është dislokuar një batalion i ushtarëve turq të NATO-s. Vendimi për këtë është marrë pas sulmeve të grupeve të serbëve ushtarëve të KFOR-it në Zveçan, ku u lënduan 30 ushtarë italianë e hungarezë.
(r.m.)