Tiranë, 3 korrik 2024 – Presidentja e Kosovës, Vjosa Osmani, ka marrë pjesë në ceremoninë e lamtumirës së shkrimtarit më të madh shqiptar, Ismail Kadare, që u zhvillua sot në Tiranë.
Zonja Osmani, në një postim në Facebook, e ka cilësuar Kadarenë “titani i letërisë”.
“Për dekada të tëra, veprat e Ismail Kadaresë ndriçuan cepat më të errët të historisë dhe shpirtit njerëzor”, ka shkruar ajo.
“…jemi përgjithmonë mirënjohës për veprat që na la”, ka theksuan ajo.
Postimi i plotë:
Me zemër të rënduar i thamë lamtumirë penës së shquar dhe kolosit të papërsëritshëm, fjalët e të cilit kapërcyen kufijtë, kulturat dhe kohën.
Për dekada të tëra, veprat e Ismail Kadaresë ndriçuan cepat më të errët të historisë dhe shpirtit njerëzor. Aftësia e tij për të gërshetuar historinë, mitet dhe realitetin, e bëri zërin e tij një nga më të veçantët dhe më të fuqishmit në letërsinë bashkëkohore. Prandaj, jemi përgjithmonë mirënjohës për veprat që na la.
Liria e Kosovës për të ishte triumfi i kombit shqiptar. Ndërkaq, për kombin shqiptar, vetë ekzistenca dhe vepra e Ismail Kadaresë është triumf i kulturës mbi injorancën dhe i lirisë mbi diktaturën.
Lamtumirë, titani i letërsisë, Ismail Kadare!
(r.m.)